Сумар дня на 8. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 8. квітня/апріля 2025 р.

«Безпечне Погранича – спілпраца трансграничных ґмін находячых ся в Звязку Ґмін Доріча Вислокы і Пряшівского Самосправного Краю»

Звязок Ґмін Доріча Вислокы отримал дальше дофінансуваня на реализацию трансграничного проєкту «Безпечне Погранича – спілпраца трансграничных ґмін находячых ся в Звязку Ґмін Доріча Вислокы і Пряшівского Самосправного Краю». Проєкт нашол ся в пріоритеті катеґориі «Приязне натурі і безпечне погранича». Цілю єст ліпша підпора достосуваня ся до змін климату та поправа безпекы жытелів через вводжыня адаптацийных і превенцийных діянь. Проєкт реализуваный буде в партнерстві понад 20 підметів. Лідером єст Звязок Ґмін Доріча Вислокы. По польскій страні в діянях участ возмут м.ін. ґміна Ясло, Крампна, Новый Змигород. Головным партнером по словацкій страні єст ґміна Нижня Полянка, а заанґажуваных в проєкт єст іщы сім єдиниц зо Словациі. В рамках реализациі проєкту підметы будут мочы выпосажыти єдниці Охотничой Пожарничой Стражы, плянуване єст введіня пілотажового систему візийного моніторінґу, орґанізация спільных школінь ратовничых служб та ведіня інформацийно-едукацийных діянь направленых на жытелів реґіону. Вартіст проєкту то понад 1 млн евро і реализуваный буде од липця/юлия 2025 р. до червця/юнія 2027 р.

До кінця квітня мож зголашати заслуженых в захованю локальной культуровой достоменности до нагороды ім. Романа Райнфуса.

Стартує XIV едиция Нагороды Малопольского Воєвідства ім. Романа Райнфуса. Премія признавана єст каждого рока за особливы успіхы в обширы захованя локальной культуровой достоменности. Направлена єст на жытелів Малопольщы, котры активні діют для підпераня та захованя культуровой достоменности так в рамках іх професийной діяльности, як і соспільной роботы. Зголошыня до конкурсу може складати конкурсова капітула, інституциі і позаурядовы орґанізациі, інституциі культуры, орґаны ґміны, повіту і воєвідства, а тіж орґанізацийны єдиниці публичной адміністрациі і конфесийны звязкы. Зголошуваны кандидаты мусят ся выріжнити в охороні або промуваню материяльной і нематерияльной спадковины. Дла лавреатів орґанізаторы зрыхтували фінансовы нагороды. Зголошыня сут приниманы до 30. квітня/апріля.

Курорт в Вапенным буде мал новы атракциі

Ґміна Санкова заінвестує в найменшый курорт в Польщы. Іде о модернізацию Парку в Вапенным. В рамках інвестициі плянувана єст модернізация фонтанны, розбудова солянковой інгаляториі, розбудоба амфітеатру та будова пляцу забав і скейтпарку. Як передала війт ґміны Санкова, променада, парк і загороды змінят ся. Ґміна цілый час інвестує в розвиток курорту, так зебы піднести його туристичну вартіст і притягнути куротнкиків і туристів. На проведіня модернізациі ґміна має до диспозициі коло 8 млн зл. Проєктова документация єст уж готова, сут тіж необхідны позволіня на будову, лишыло ся іщы оголосити конкурс на выконавцю перебудовы парку.

«Никыфор. Світ наівного реализму»

В Ґрудзіондзу мож обзерати выставу пн. «Никыфор. Світ наівного реализму». То перша выстава прац Епіфана Дровняка в тым музею. Презентуваны образы походят з колекциі Боґдана Якубовского. В першый четвер квітня/апріля прошол вернісаж выставы разом з сеансом фільму «Мій Никыфор» і выкладом куратора выставы Лукаша Цєміньского. Выставу мож буде обзерати в музею до 22. червця/юнія тр