Сумар дня на 8. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 8. квітня/апріля 2022 р.

Німецка меншына заскаржыла розпоряджыня міністра Наукы і Едукациі

Німецка меншына заскаржыла розпоряджыня міністра Наукы і Едукациі Пшемыслава Чарнка до Европейской Комісиі. Рахує, же справом займе ся Трибунал Справедливости Европейской Уніі. Припомнийме, же згідно з розпоряджынями од 1. вересня/септембра тр. тыжньове чысло годин вчыня німецкого як меншынового языка має быти зменшене з трьох до єдной годины. Інчым розпоряджыньом некорыстно змінено спосіб нарахуваня субвенциі для учеників німецкой меншыны. Розпоряджыня сут консеквенцийом буджетового закону на текучый рік, якій зменшат част освітовой субвенциі на вчыня языків меншын о близко 40 млн злотых. Німецка меншына рішыла і завісити свою участ в Спільній Комісиі Уряду та Нацийональных і Етнічных Меншын. Проєкты розпоряджынь не были перше даны до опініі Комісиі, што єст незгідне з обовязуючыма леґісляцийныма процедурами.

Новы выданя в Русинів в Сербіі

Як подала аґентура Рутенпрес, 6. квітня/апріля тр. в кіновій сали Філософічного Факультету Університету в Новым Саді одбыла ся презентация двох новых выдань, котры вышли друком в Русинів в Сербіі. Першым є «Правопис русиньского языка з правописным словником», авторами котрого сут Гелена Медєші і Михайло Фейса. Книжка была выдана Заводом про Культуру Войводиньскых Русинів вєдно з Дружством про Русиньскій Язык, Культуру і Літературу та Одділіньом Русиністикы Філософічного Факультету Університету в Новым Саді. Другым презентуваным выданьом была «Мала істория Русинів» од вызначного русиньского історика Івана Попа, котра тепер вышла і в войводиньскым вариянті русиньского языка. Книжку выдала орґанізация Руска Матка. Публикация мала бы ословити Русинів перед списуваньом люди, якє там буде проходило тот рік осіню.

Нова «Бесіда»

Явил ся дальшый номер часопису Стоваришыня Лемків «Бесіда», ч. 2 (185) за місяці марец/квітен. Чысло припоминат о ближучых ся Великодніх Святах, а тіж о 75. річници выгнаня з рідной Лемковины. В «Бесіді» прочытаме м.ін. про ґорлицкого бурсака доктора габілітуваного Павла Малецкого і зобраня членів Руской Бурсы, а тіж про ювілей, 70. річницю народжыня Павла Стафиняка. В часописі поміщены і дописы про округлы річниці народжыня Семана Мадзеляна і Павла Стефановского. Інчый допис тыкат заскаржыя омбудсманом новелизациі, яка зблокувала зворот лемківскых лісів. В новым выданю сут і комунікаты, котры были выданы лемківскыма/русиньскыма орґанізациями проти напасти Росийской Федерациі на Украіну. Стоваришыня Лемків інформує і о акциі «Лемкы Украіні», збірці фондів на гуманіtарну поміч жытелям Украіны. В звязку з блужучом ся 75. річницьом початку Акциі «Вісла» Стоваришыня припоминат і кличе на упамятніня, якы пройдут 30. квітня/апріля в Біличній, Устю Рускым і Рускій Бурсі в Ґорлицях.

Нова туристична стежка з Лоси до Мушыны

Ґміну Лабова і Мушыну получыла нова туристична стежка. На єй обшыри неодолга завершат роботы звязаны з монтажом табличок і знаків. Початок нового пути находит ся в Лоси, дале стежка перетинат ся з червеным шляком ідучым в сторону Креницкой Яворины і Лабівской Галі, єй конец єст в Мушыні. 8-кілометровый пут в літнім сезоні має служыти пішым і біциґлистам, а зимом буде мож по ним іздити на лыжах.