Сумар дня на 8. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 7. квітня/апріля
2020 р.

Проба пред повселюдным списком в 2021 р.

В 16-ох польскых місцевостях зачало ся пробне повселюдне списуваня. Зо взгялду на безпеку проходит оно з вылучыньом безпосереднього контакту, выключні через телефон або інтернет. Єст то другє пробне списуваня перед нацийональным повселюдным списуваньом в Польскій Республиці, якє пройде в 2021 році. Хто з выбраных місцевости не спише ся сам через інтернет, товды задзвонит до него консультант. В баданю даваны сут звіданя про родинны реляциі, мешканя та дрібницьово про особовы даны. Появляют ся два звіданя про нацийональніст (нацийонально-етнічну приналежніст). Кєд дахто чує, што ідентифікує ся з двома нацийональныма соспільностями, може так ся записати, выбераючы в каждым звіданю по єдній нацийональности. Кєд ні – в другым звіданю мусит выбрати позицию, котра неґує приналежніст до другой нацийональности. В примірі звіданя о язык, котрый хоснує ся дома, мож выбрати одповід «польскій і інчый як польскій» або «выключні інчый як польскій». В обох примірах треба найти на списку даный язык, а кєд го неє, то записати своє окрисліня языка. Детальный опис списовых звідянь доступный єст на сайті spis.gov.pl.

Вернули з роботом при будові експресовой дорогы С3 під Любіном

Перед парома днями вкінци рушыли роботы на пляци будовы експресовой дорогы С3 (S3) під Любіном. Робітникы, котры мали ввойти з роботом в половині марця, зо взгляду на пошырюючу ся пандемію коронавіруса не зробили того і не было знатя, коли рушат роботы. Єднак 2. квітня/апріля тр. машыны урухомлено, появила ся екіпа. Аж в листопаді/новембрі минулого рока розвязал ся проблем на докінчыня нещестного одтинка дорогы С3 медже Польковицями а Любіном. Ґенеральна Дирекция Доріг і Автострад підписала товды догваріня з выконавцьом. Роботы на одтинку коло 14,5 км реалізує консорциюм фірм Mota-Engil Central Europe – лідер, Masfalt та Drogomex – партнеры. Вартіст то близко 228,4 млн зл. Выконавця мал мати 12 місяців на докінчыня дорогы, з вылучыньом зимовых місяців, але через пандемію закінчыня робіт плянуване на другій квартал 2021 рока певністю ся пересуне. Фраґмент дорогы медже Польковицями а Любіном не має щестя. Термін закінчыня робіт был уж вельократні переношеный. Попередній выконавця, італияньска фірма Salini, свій поворот на будову зробил залежный од отриманя додатковых грошів, на што не пристала Ґенеральна Дирекция Доріг і Автострад.

Варголь, замок Стара Любовня, Кежмарскій Замок і інчы на вытягніня рукы

Леа Геілова з Одділіня Комунікациі і Пропаґациі Уряду Пряшівского Самосправного Краю поінформувала, што культурны інституциі, котрыма заряджат Пряшівскій Самосправный Край, сут доступны до одвиджаня онляйн. Мож за посередництвом компутера перейти по подвірци замку Стара Любовня, мож на Кежмарскым Замку видіти його інтеріоры, музей культуры бываня і выставову салю. На вебсайті Татряньской Ґалериі в Попраді до обзераня є пят експозиций вызначных артистів: Мірослава Ціпара, Віктора Фреша, Едуарда Овчачка, Ладислава Медняньского і Анны Ондрушековой. Любителі малярства можут попозерати іщы на тото, што до запропонуваня має Шаришска Ґалерия в Пряшові. А буде то выстава робіт: Штефана Гудака, Штефана Костелнічка, Душана Шолца ци нашого краяна – Енді Варгола. Окрем выміненого іщы Выгорлятскій Музей в Гуменным рыхтує онляйновый проєкт під назвом «Музей дома», будут вказувати людям нетрадицийны погляды тыкаючы експозиций і запрезентуют активности розвиваючы творче думаня в обшыри істориі, етноґрафіі і енвіроментальных тем.

Беркуты зачынают однавляти гнізда і рыхтувати ся на молоды

Беркуты, котры зимували в Африці, вернули уж до полудньово-східньой Польщы. Найбільше нагромаджыня тых птахів в Европі є в Низкым Бескіді. Птахы літают уж по небі Саноцко-Турчаньскых Гір, Низкого Бескіду і Бєщад. За пару дни зачнут токувати і однавляти гнізда, а по 20. квітня/апріля зачнут зносити яйця і на них сідити. Беркуты зимуют в центральній і полудньовій Африці. Подля Комітету Охороны Орлів, в польскій державі є більше як 2,5 тисяча пар тых птахів. Більше як половина світовой популяциі беркута заселят три европейскы державы: Польщу, Білорусь і Латвію.