Сумар дня на 8. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 8. грудня/децембра 2023 р.

Засіданя Выбору про нацийональны меншыны і етнічны ґрупы

В середу 6. грудня/децембра проходило в Братиславі 51. засіданя Выбору про нацийональны меншыны і етнічны ґрупы Рады влады Словацкой Республикы про людскы права, нацийональны меншыны і родову рівніст. Выбор засідал частично параліжуваный, кєд же не має свого председы. Председом выбору є ex offo полномічный влады Словацкой Республкы про нацийональны меншыны. В жолтни/октобрі тр. влада Роберта Фіца одкликала з той посады Ласла Буковского, і дотепер не выменувала нового полномічного. Выкликало то проблемы м.ін. звязаны з голосуваньом о узнесінях. На основі зміны статуту, в Выборі засідало уж трьох Русинів – Петер Медвід, Мілян Ян Піліп і новый член Мартін Караш. До дотеперішнього заступці Петра Штефаняка долучыл на тоту посаду Мафтей Допіряк, а місце третього остає необсаджене. На засіданю были порушаны темы Фонду на підпору культуры нацийональных меншын і новелизация закону о реченым фонді, яка єст актуально рыхтувана. Бесідувано і о квестиі нацийонального высыланя, тіж в контексті русиньской меншыны, котра од часу посліднього списуваня достала менше премєровых проґрамів, мимо же меншына наросла. Деталі про засіданя чытайте в дописі на нашым портали.

«Безпечны дорогы в Малопольщы»

Під конец листопада/новембра завершыла ся штырнадцета едиция самоурядового конкурсу «Безпечны дорогы в Малопольщы». Был він зорґанізуваный для ґмін, повітів і самоурядів приязных біциґлистам на найліпшы діяня в 2022 р. Конкурс має на ціли збільшыня безпекы дорогового руху і активне діяня в обшыри будовы ходників ци роверовых стежок. За своі діяня для безпекы жытелів была доцінена Санкова, котра заняла перше місце за выбудуваня біциґльовой стежкы в катеґориі «Самоуряд Приязный Біциґлистам в 2022 р.».

80 приповідок в книжковій формі

Хоцкы то уж три рокы, коли попращали сме ся з Ольгом Прокоп, вызначном русиньском культурном діятчком з Підкарпатя, одказ, котрый по собі лишыла завдякы свому ціложытьовому трудови, жыє дальше. Як поінформувал в середу 6. грудня/децембра голова Русиньского культуролоґічного клюбу Юрий Шыпович, в выдавництві РІК-У вышла збірка «Казкы з телевізора», в котрій позберано 80 приповідок народів світа в русиньскым языку, якы знана карпаторусиньска співачка Ольга Прокоп в 2019 р. розповідала в рамках телевізийного проєкту Першого кабельного каналу «Вечірня казка». Припомнийме, што лем в липци/юлию тр. был одпрезентуваный 552-страницьовый збірник «Русиньскы співанкы», котры Ольга Прокоп зберала ціле своє жытя. Більше чытайте на нашым портали.

Будут бальконы

В Польковицях в части будинків, што приналежат до польковицкого кооперативу, не передвиджено бальконів, коли были проєктуваны. Новы технолоґіі в будівництві позваляют єднак такій балькон дочыпити. Першы бальконы в блоках были уж замонтуваны. Кооператив рыхтує проєкты для дальшых будинків. Єст то ініциятива жытелів. Жебы мож было замонтувати бальконы – треба згоды векшости властителів мешкань в будинку. В дакотрых блоках 50% жытелів не згодило ся на бальконы, зато іх не буде тыкала ініциятива. Проєкт єст фінансуваный польковицкым кооперативом, але кошт балькону ци выміны вікна єст по стороні жытеля.