Сумар дня на 7. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 7. жолтня/октобра 2022 р.

ХХХ Лемківска Творча Осін

Уж заран зачне ся ювілейна ХХХ Лемківска Творча Осін – свято лемківской літературы. Подія того рока в першый ден (8. жолтня/октобра) пройде в Білянці, де припоминати будеме недожытых 90 років Павла Стефановского, вызначного лемківского діяча, політика, етноґрафа і поеты. О його жытю і творчости розповіст др габ. Олена Дуць-Файфер, проф. ЯУ, а найновшу публикацию з творчістю вітця представит др габ. Лідия Стефановска. В рамках артистичного проґраму в Сельскым Домі в Білянці о 17.00 год. выступит русиньскій ансамбль Барвінок з Камюнкы, котрый того рока празднує округлый ювілей – 70. річницю діяльности. Другій ден, традицийні, пройде в просторах Руской Бурсы. Того рока запрошыня до участи в святі лемківской літературы приняли творці та тоты, што єй пропаґуют, аж з Сербіі, Італиі, Словациі і ріжных части Польщы, в тым зо Шлеска (буде чытана і лемківска поезия в шлезскым языку). Орґанізаторами подіі сут Стоваришыня Лемків і Стоваришыня «Руска Бурса» в Ґорлицях.

Етнічны меншыны і етноґрафічны ґрупы в Малопольщы – часова выстава в Скансені Погіряньского Села в Шымбарку

Од 3. жолтня/октобра в Скансені Погіряньского Села в Шымбарку мож обзерати пляншову обіздову выставу посвячену темі етнічных і етноґрафічных ґруп з обшыри Малопоьщы. Часова выстава пн. «Етнічны меншыны і етноґрафічны ґрупы в Малопольщы – Лемкы, Німці, Циґане і Жыды» буде одкрыта до кінця того рока. Передставлят она історичный рис і коротку характеристику поєдных меншын, в тым актуальну обшыр іх прожываня, центра культурной діяльности і найважнійшы орґанізациі. Експозиция єст збогачена чысленныма фотоґрафіями, што документуют фунґуваня ґруп і діяня, якы підтримуют іх унікатовы традициі. Выстава была прирыхтувана Округовым Музейом в Тарнові в рамках культурного проєкту «SKANSENOVA – системова опіка над спадковином в малопольскых музеях під одкрытым небом».

Лемківска поезия в МЦК в Кракові

Заран, в суботу – 8. жолтня/октобра, в Медженародным Центрі Культуры в Кракові одбуде ся Ніч Поезиі. Подія пн. «Антонич і Грабан. Свобода, памят, достоменніст в лемківскій поезиі» зачне ся о 20.00 год. і буде трансмітувана нажыво на фейсбуковым сайті МЦК. Гістми будут Володислав Грабан і Катажына Шведа, а стрічу вюл буде Ян Бурнатовскій.

Нова форма спертя будовы православной церкви в Ґладышові

Фурт поступуют працы при будові новой православной святыні в Ґладышові. Єст шанса, же іщы в тым році поведе ся поставити баню на олтарній части церкви. Парохія просит о дальше фінансове спертя будовы. Окрем прямых трансферів і онляйновой колекты, мож підтримати тоту ініциятиву і на другы способы. Парохія разом з Комітетом Будовы Церкви просят на «Гулянкову забаву», получену з акцийом спертя чыну будовы святыні в Ґладышові. Дрібниці находят ся на фейсбуковым сайті чыну будовы православной церкви в Ґладышові. Забаві, яка ся одбуде в листопаді/новембрі, будут товаришыти ліцитациі, з котрых цілый дохід буде переданый на будову храму.