Сумар дня на 7. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 7. вересня/септембра 2022 р.

Статуя Духновича при школі

Школярі на Словациі черговый шкільный рік зачали з початком тыжня, значыт 5. вересня/септембра. Основна Школа Духновичова в Меджелабірцях зачала го особливі торжественно. На обшыри школы посвятили в тот ден деревяну плястику представляючу Александра Духновича з двома учениками. Єй автором єст Юрай Чутек, а подарувала ю Фундация Деревяна Церковця Габура. Плястику артиста зробил в рамках 4. едициі Скульпторного Симпозиюм Олены Мадіч-Шіналі. На одкрытю присутны были школярі Духновичовой Школы і дальшы гості. Бургомайстер Меджелабірців Владислав Вышньовскій повіл, што скульптура є потверджыньом, же Меджелабірці сут русиньскым містом і жыют в ним Руисны, котры днес можут свобідні бесідувати о своім походжыню. В імени Русиньской Оброды на Словациі присутный был Володимір Противняк.

Ци поведе ся сохранити выняткову долину Лемковины?

В інтернеті явила ся соспільна петиция, котрой цілю є сохранити єдну з послідніх спокійных части Лемковины, сохранити долину о вынятковым характері, яком є долина сел Чорного, Долгого і Радоцины. В рамках петициі збераны сут підписы осіб, котры не годят ся выасфальтувати дорогу, што веде реченом долином. Авторы петициі, а заєдно мешканці выміненых сел, вельократні і єднозначні інформували війт ґміны Санкова Малґожату Малух, што хотят оставити характер каменистой дорогы і не хотят асфальту. На стрічы в уряді ґміны 8. червця/юнія війт Малух ствердила, што дорога буде лем ремонтувана, не асфальтувана, зас на зобраню шолтыства Кривой, што прошло 16. серпня/авґуста, подали інформацию о асфальтуваню дорогы, што в 95% мают сфінансувати Державны Лісы. Противниками такой формы ремонту дорогы сут жытелі сел, туристы той части Лемковины і природникы. Мотузок до петициі подаме на нашым портали.

«Справедлива Серед Наций Світа» в Рыхвалді

Уж заран при церкви Покровы Богородиці в Рыхвалді пройде одкрытя пропамятной таблиці в 115. річницю народин Мариі Котарбы «Справедливой Серед Наций Світа». В проґрамі торжества сут м.ін. принагідны промовы, богослужыня в інтенциі Мариі Котарбы і вшыткых жертв концентрацийных лаґрів ІІ світовой войны, а тіж проєкция документального фільму о Мариі Котарбі і Лені Лакомы. Марию Котарбу, як курєрку польского руху опору, арештувало ґестапо і помістило в лаґрі в Освєнцімі. Там анґажувала ся в поміч увязненым Жыдам, особливо Лені Манковскій. Шмуґлювала ідло, лікарства і відомости медже лаґром а ґрупами опору діючыма поза лаґром. По освободжыню Мария Котарба вернула до Польщы, де вмерла на 49. році жытя, не вернувшы до доброго здоровля. Поховали єй в Рыхвалді.

Остан волонтером/волонтерком Лемковины Ультра Трейль!

Ближыт ся осінній термін змагань в літаню Лемковина Ультра Трейль. Того рока репрезентация Лемків, найменше 15 осіб, буде брала участ в змаганях на вшыткых плянуваных долгостях: 150, 70, 48 і 30 км. Іщы фурт мож зголосити свою участ в самых змаганях, як бігач, але од вчера рушыли записы для волонтерів, а тых орґанізаторы потрібуют веце як 200 осіб ЛемкоЕкіпы, як самы іх называют. Орґанізатор змагань, котрым є Фундация Ультра, ґарантує окрем кавы, атракций, крас видоків, специяльный ґаджет од технічного партнера – маркы Columbia Sportswear. Мотузок, за котрым мож зголосити ся як волонтер/волонтерка, найдете на офіцийным фанпейжы Лемковины Ультра Трейль в сіти Facebook.