Сумар дня на 7. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 7. вересня/септембра 2021 р.

Добра відоміст для любителів сурвівалю і близкых контактів з природом

Надлісництво Ґорлиці запрезентувало листу лісовых комплексів, де мож буде ночувати в рамках загальнопольского проґраму «Ночуй в лісі». На обшыри ґорлицкого надлісництва удоступнено лісовы одділы в лісництвах Лужна, Мацина, Бодакы, Маластів, Конечна і Граб. Докладна локализация удоступненых обшыри находит ся на сайті надлісництва. Припоминаме, же згідні з вымогами зголошувати побыт не буде конечне, кєд ночуючых буде менше як 9 осіб і лишат ся не долше як дві ночы єдна по другій. Інакше кєд ночувало буде більше як 9 осіб або долше як дві ночы, в такій ситуациі треба буде выслати електронічне зголошыня до надлісництва, на обшыри котрого проходил буде нічліг. В обох припадках можлівіст ночувати єст дармова. Што барз важне, вшыткы корыстаючы з такой можливости сут зобовязаны попрятати за собом і лишыти місце такє, як было оно в початковым стані.

X Етноґрафічный Роверовый Райд слідами проф. Романа Райнфуса

Стоваришыня GorliceBike разом зо Скансеном Погіряньского Села в Шымбарку просят 19. вересня/септембра на X едицию Етноґрафічного Роверового Райду слідами проф. Романа Райнфуса. Орґанізаторы подіі зрыхтували для участників 4 трасы до выбору, в залежности од приготуваня і выпосажыня охочых. Чысло участників єст ограничене, в райді може взяти част лем 100 осіб. Жебы ся записати на змаганя, треба выполнити інтернетовый формуляр. Більше інформаций і гармоноґрам стрічы найдете на сайті gorlicebike.pl.

«Бібліотека для чловека» – стріча з Моніком Шнайдерман

Ґмінна Публична Бібліотека в Устю Рускым просит на цикль авторскых стріч пн. «Бібліотека для чловека», якы проходят в рамках проґраму Партнерство для книжкы. Перша стріча одбуде ся 8. вересня/септембра, а запрошеном творчыньом єст Моніка Шнайдерман, авторка м.ін. книжкы пн. «Порожній Ліс», про село Воловец, в котрым жыє од парудесятьох років, та його бывшых жытелів – Лемків, Жыдів, Поляків, і про сусідні обшыри. Стріча зачне ся о 19.00 год. в бібліотеці в Устю Рускым.

Утрудніня на трасі до Устя Руского. Tреба памятати о обіздах

Припоминаме, же вчера зачал ся ремонт єдного з устяньскых мостів, котрый находит ся на трасі з Ґладышова до Устя Руского, над ріком Ждынянком. До Устя Руского мож тепер доіхати вызначеныма обіздами, єден іде через Шквіртне і Ганчову, другій через Кункову, Лося і Климківку. Додатково в остатнім часі Надлісництво Лося рішыло підпорити реґіональну інвестицию і переказати 34 тис. зл на ремонт устяньского мосту.

Новы інвестициі в Ґміні Санкова – жытелі Волівця дождали ся ремонту дорогы

На сайті Уряду Ґміны Санкова вказала ся інформация о підписаню умовы на модернізацию ґмінной дорогы на долгости 480 м в місцевости Воловец. Кошторис інвестициі то близко 250 тис. зл, з чого половина то дотация з Малопольского Воєвідства. Єст то добра новина не лем для жытелів Волівця, але тіж туристів, котры одвиджают сховане медже горами село.