Сумар дня на 7. вересня/септембра 2020 р.

Приносиме вам сумар медияльной ґрупы ЛЕМ.фм+ на ден 7. вересня/септембра 2020 р.

Польща неприязна меншынам подля OECD

Польща єдном з держав найменше приязном меншынам. Орґанізация Економічной Спілпрацы і Розвитку (OECD) опубликувала 2. вересня/септембра рапорт «All Hands in? Making Diversity Work For All», якій тыкал ріжнорідности в державах спільноты. Серед досліджаных держав лем в Польщы і на Мадярах занотувано зменшыня акцептациі ґу трьом специяльным ґрупам: етнічным меншынам, особам ЛҐТБ і міґрантам. В рапорті досліджано предовшыткым тото, як выглядат ситуация на рынку працы ґруп, якы можут быти дискримінуваны з огляду на етнічне походжыня, рід, неполносправніст або вік. В рапорті нашли ся тіж стратеґіі для приватных фірм і публичных інституций, тыкаючы збільшыня ріжнорідности в місци працы. Важным елементом рапорту были досліджыня однесіня до ріжнорідности в поєдных державах. OECD покликала ся на своі першы досліджыня, подля котрых отвертіст на міґрантів, акцептация для ЛҐТБ і підтримка для міґрантів сут зо собом повязаны. Авторы рапорту спостерігают, што зміцняня в соспільстві позитивных постав в однесіню до єдных меншын спричынят позитивны поставы в однесіню до інчых дискримінуваных ґруп. Кус більше як половина жытелів держав OECD (55%) думат, што іх околиці то добре місце до прожываня для етнічных меншын, осіб ЛҐТБ і іміґрантів. Польща єст на третім місци, за Мадярами і Турцийом, серед держав найменше приязных меншынам.

Сліды істориі в ґорлицкій земли

Ґорлицка земля крыє іщы вельо таємниц і слідів по своіх давных жытелях і своій богатій істориі. В минулу суботу, 5. вересня/септембра, в часі прац при будуваным тепер лучнику улиц Стружівской і Корчака в Ґорлицях выкопано патрон калібер 120 мм, з запальником ам93, з часів I світовой войны. Найдена куля была одповідньо забезпечена, покля ся ньом не заняли саперы. Не єст то єдиный такій, што в недавным часі найдено. Перше при роботах нашли і фраґменты інчых патронів.

Видокова вежа в Креници выріжнена

Видокова вежа, яка ся находит в Креници, заняла в перше місце в престіжным архітектонічным конкурсі Будова Рока. Єст то конкурс орґанізуваный што рока Польскым Звязком Інжынєрів і Техніків Будівництва та Головным Урядом Будівляного Надзору. Його цілю єст оцінити будівляны обєкты, на котрых досягнули выріжняючы ся реалізацийны результаты. Предметом конкурсу сут будівляны обєкты, інвестицийный або модернізацийный процес зо вшыткых видів будівництва. Креницка видокова вежа, высока на 49,5 м, была одкрыта влони, і была першым того рода проєктом в Польщы і Европі. До вежы веде едукацийна стежка в коронах дерев.

Фестіваль церковной музикы в Гайнівці

Для любителів церковной музикы маме добру інформацию. На офіцияльным фейсбуковым фанпейджы Меженародного Фестівалю Гайнівскы Дни Церковной Музикы явила ся інформация, што тогорічна едиция подіі ся одбуде. Вынятково, 39. едиция фестівалю буде проходила в днях од 14. до 19. вересня/септембра в соборі св. Тройці в Гайнівці. В четвер і пятницю 17.-18. вересня/септембра од год. 16.00 в гайнівскій катедрі будут проходити переслуханя зголошеных хорів і ансамблів. В суботу, 19. вересня/септембра, пройдут аж два ґальовы концерты. Першый в соборі св. Тройці в Гайнівці о 15.00 год., а другій о 19.00 год. в церкви Агія Софія в Білымстоку. Вшыткы концерты буде мож пак традицийно слухати і обзерати в сервісі Ютюб. Цілый проґрам уж неодолга на офіцияльным сайті фестівалю.