Сумар дня на 7. марця 2024 р.

Приносиме вам сумар медияльной ґрупы ЛЕМ.фм+ на ден 7. марця 2024 р.

Засідала Світова Рада Русинів

В пятницю, 1. марця 2024 р. в румуньскым Переґу Маре зышли ся члены Світовой Рады Русинів (СРР), на челі з председом Світового Конґресу Русинів (СКР) Штефаном Лявинцьом, на 3. реґулярным засіданю СРР в меджеконґресовым періоді. В рамках засіданя члены рады брали участ і в святкуваню Дня Русинів Румуніі, котрый є встановленый на 3. марця, а так само в конференциі під назвом «Русиньска історія і русиньскій язык в теперішнім світі». На конференциі, котрой президию творили др Штефан Лявинец, др Ґеорґій Фірцак і о. Василь Бойчук, выступило десят реферуючых. В суботу проходила уж робоча част СРР. Єдным з пунктів засіданя, котрый был бесідуваный, была інформация о приготовлінях XVIIІ Світового Конґресу Русинів, котрый орґанізує в слідучім році членьска орґанізация з Румуніі. Конґрес має ся одбыти в першый тыжден червця/юнія 2025 р. в Бухаресті. Члены рішали і другы темы повязаны зо штоденном діяльністю рады і поєдных членьскых орґанізаций. Бесідувано о признаню Преміі Василя Турока-Гетеша і Нацийональной Премії за русиньскє уменя ім. Івана Манайла Pro Arte Ruthenorum.

Засіданя Собору Єпископів ПАПЦ

5. марця під ведіньом митрополиты Савы засідал Собор Єпископів ПАПЦ, на котрым рішано так внутрішні, як і зовнішні темы повязаны з жытьом православной церкви. З внутрішніх тем рішено м.ін. справу тогорічных святкувань 100. річниці отриманя через ПАПЦ автокефалиі. В тій справі владыкы приняли текст пастырского посланя з той нагоды. Призначено тіж проґрам святкувань. Собор рішыл тіж в справі пасхальных нагорід. Серед нагородженых священників сут єґомості, якы служат на лемківскых парохіях. Право ношыня другого креста отримал о. митр. Василь Ґальчык. Митру отримали м.ін. о. Любомир Воргач, о. Андрий Ґрич і о. Артур Грабан. Затверджено тіж митрополитарны збіркы, серед них на перебудову церкви в Студзьонках на західніх землях Польщы, будову каплиці на Святій Горі Явір, ремонт єпархіяльного будинку при церкви в Ґорлицях ци ремонт церкви в Ліщынах.

Польковицкы сеньоры мают ся добрі

З сеньорами Польковицкого Університету Третього Віку стрітили ся бургомайстер Польковиц Лукаш Пузнєцкій і його заступця Кжыштоф Нестер. Польковицкы сеньоры можут корыстати безпалтно з вельох здравотных, социяльных проґрамів ци брати участ в ріжного рода занятях. Подля участників Університету, коли польковицкы сеньоры стрічают ся з другыма сеньорами з інчых части Польщы, тоты другы часто мают ім чого завидити – в Польковицях для сеньорів діє ся вельо і сут то атракцийны акциі. Вчас стрічы, яка одбыла ся в будинку Учельні Яна Выжыковского, бургомайстер і його заступця годны были видіти результаты веденых варштатів орґанізуваных для сеньорів.

Книга рока ПСК

Як інформувало Одділіня Комунікациі Пряшівского Самосправного Краю (ПСК), крайска самосправа разом з Крайском Бібліотеком Павла Орсаґа Гвієздослава і реґіоналныма бібліотеками в Попраді, Левочы, Воронові над Топльом, Гуменным, Свиднику, Бардийові і Старій Любовни выголосили 7. річник чытательского конкурсу «Книга рока ПСК». Книжкы, котры мож приголосити до конкурсу, мусят мати звязок з реґіонами ПСК. Публикациі мож передкладати в пятьох катеґориях: Белетристика для діти і молодежы, Белетристика для дорослых, Наукова література і Популярно-наукова література. Послідньом катеґорийом є украіньска і русиньска література. Номінувати мож книжкы, котры были выданы в 2022 і 2023 рр. Остатній ден на подаваня номінаций є 30. квітня/апріля. Святочне уділіня нагорід одбуде ся в вересни/септембрі 2024 р.