Сумар дня на 7. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 7. лютого/фебруара 2025 р.

Пряшівскій Самосправный Край приєднал ся до Позицийного Документу Европейскых Реґіонів

Пряшівскій Самосправный Край потвердил своє заанґажуваня в обшыри підпоры когезивной політикы Европейской Уніі приєднаньом ся до Позицийного Документу Европейскых Реґіонів. Інформувало о тым Одділіня комунікациі ПСК. Тым кроком Пряшівскій Самосправный Край придал ся ґу веце як 120 реґіонам і містам з цілой Европы, котры вєдно діют для зрівноваженого розвитку і зліпшаня якости жытя громадян. Підписуючы документ крайска самосправа выразила підпору про три ключовы пожаданя, підкрислены в документі: доступ до когезивной політикы про вшыткы реґіоны, адекватный буджет про долгодобы інвестициі, як і посиленый діалоґ медже европейскыма реґіонами і Европейском Комісийом. В пункті о доступности когезивной політикы про вшыткы реґіоны документ жадат заховати політику приналежности, котра буде рефлектувала розмаітіст окремых реґіонів і іх специфічны потребы в обшыри еколоґічной, діґітальной і демоґрафічной трансформациі. Подля крайской самосправы приєднаня ПСК до того документу є фундаментальным роком, котрый є направленый на інтенсивнійшу спілпрацу медже европейскыма реґіонами і сполняня общых цілів зрівноваженого розвитку. Веце на тоту тему прочытате на нашым портали.

Малопольскій воєвода стрітил ся з полномічныма

В минулый віторок 4. лютого/фебруара малопольскій воєвода Кжыштоф Ян Кленчар стрітил ся зо своіма полномічныма. В стрічы взяли участ і дальшы працівникы Малопольского Воєвідского Уряду. До задач воєводы належат м.ін. справы нацийональных і етнічных меншын, спілпраца з єдиницями територияльного самоуряду, квестиі рільництва ци імплементация і реализация задач выникаючых з закону о охороні населіня і цивільній обороні. В специялистичных обшырях воєводу сперают покликаны ним полномічны, в тым до справ нацийональных і етнічных меншын. Як підкрислил воєвода, знаня і досвідчыня його полномічных то цінный капітал, завдякы котрому спільно можут ся міряти з найтруднійшыма вызванями. Додал, што повірят ім ролю амбасадорів шору важных справ.

Власти Санковой плянуют дальшы інвестициі на Маластівскій Маґурі

Згідно з пляном власти ґміны Санкова на верху Маластівской Маґуры стане видокова вежа. Подля власти вежа має дополнити туристичну оферту реґіону. Фурт протестує проти тій інвестициі ґрупа любителів Низкого Безкіду, подля котрых вежа знищыт натуральніст і унікатніст того місця. Як поінформували власти Санковой, як част проєкту, в котрого рамках має быти побудувана вежа, буде і розбудова будинку гірской колибы під Маластівском Маґруром. В єй рамках мают быти створены нічліговы місця разом з інсталяциями, ґратьом і выпосажыньом та технічном інфраструктуром. Кошт інвестициі то понад 8 млн злотых. Працы мают рушыти уж в ближучым ся будовляным сезоні.

Дороговы інвестициі в ґміні Крениця

Бургомайстер Крениці Пьотр Рыба поінфорувал о дороговых задачах, якы отримали дофінансуваня з Урядового Фонду Розвитку Доріг. По перше, в дволітнім циклю піде до ремонту дорога Чырна-Баниця. Кошт той інвестициі то близко 5 млн злотых. По другє – повіт отримал дофінансуваня на перебудову улиці Пулаского в Креници разом з будовом тротуару, што вяже ся з розбудовом водно-канализацийной сіти. Кошт інвестиций то 11 млн і 5 млн злотых. Інвестициі будут реализуваны в роках 2025-27.

Джерело фотоґрафіі: Serwis Prasowy Małopolski Urząd Wojewódzki w Krakowie