Сумар дня на 7. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 7. лютого/фебруара 2022 р.

Зменшеный вымір вчыня німецкого як меншынового языка

В пятницю, 4. лютого/фебруара, польскій Міністер Едукациі і Наукы Пшемыслав Чарнек підписал розпоряджыня, што змінят розпоряджыня в справі условій і способу реализациі предшколями, школами і публичныма єдиницями задач позвяляючых на підтримуваня нацийональной, етнічной і языковой достоменности учеників приналежачых до нацийональных і етнічных меншын та соспільности хоснуючой реґіональный язык. Зміна тыкат зменшыня выміру вчыня німецкого як меншынового языка з трьох годин тыжньово до лем єдной. Зміна тыкат лем німецкой меншы. Нове розпоряджыня буде обовязувало од 1. вересня/септембра тр. Леґісляцийны зміны тыкаючы вчыня німецкого як языка нацийональной меншыны были безпосередньо выкликаны рішыньом Сойму о зменшыню о близко 40 млн зл. фінансовых середків на освітову част загальной субвенциі презначеной на вчыня меншыновых і реґіонального языка в школах. Ситуация выкликала дотля много протестів, свою солідарніст з німецком меншыном высловили м.ін. члены репрезентуючы меншынову част Спільной Комісиі Уряду та Нацийональных і Етнічных Меншын. Проф. др Бернд Фабрітюс, Федеральный Полномічный дс. Выселенців і Нацийоналных Меншын оцінил розпоряджыня як «неприпустну ситуацию».

Закрыты туристичны шлякы

На вебсайті Надлісництва Ґорлиці явила ся інформация о часовым закрытю некотрых туристичных шляків в реґіоні. З огляду на плянуваны працы в обшыри лісной господаркы, до кінця марця тр. закрыты будут синій шляк PTTK – Маластівска Маґура на одтинку в Лісництві Рыхвалд та част шляку «Сніжны трасы през лісы» в Лісництві Крива. Так само до кінця марця тр. частично закрытый буде червеный шляк PTTK «Головный Бескідскій Шляк». Запертый буде одтинок «Ждыня -Ясюнка», находячый ся в Лісництві Конечна.

Дармовы масочкы в ґміні Санкова

Як поінформувал Уряд Ґміны Санкова, з причыны актуальной епідемічной ситуациі і збільшаючого ся чысла зараженых коронавірусом, Малопольскій Воєвода передал самоурядам охоронны масочкы. В звязку з тым од 3. до 10. лютого/фебруара Уряд Ґміны Санкова веде акцию дистрибуциі дармовых охоронных масочок для жытелів. Масочкы сут презначены особливо для осіб найбарже потрібуючых. Мож іх одберати в годинах праци Уряду аж до скінчыня ся запасів. Неодолга дармовы масочкы повинны ся явити і в інчых ґмінах. Як заповіл в січни/януарі воєвода Лукаш Кміта, в найблизшым часі м.ін. до найбарже потрібуючых жытелів малопольского воєвідства, осередків социяльной помочы, притулків для бездомных, як і до Охотничых Пожарничых Стражы, Домів Социяльной Помочы, мундуровых служб, трафит близко 18 млн хірурґічных масочок і близко 3,5 млн масок FFP2.

Солянкову інгаляторию в Ґорлицях одкрыют на яр

Будова солянковой інгаляториі в Ґорлицях завершена. Покля што інгалятория не робит зо взгляду на низкы температуры, має быти одкрыта на яр. Товды вколо деревяной конструкциі покрытой тернином являт ся іщы новы насаджыня. Солянкова гмла, возникаюча по розбитю капель солянкы ідучых по тернині, не буде влияла на довколишнє середовиско – завдякы специяльній конструкциі солянка не достане ся до землі, а концентрация солянковой гмлы на зовни обєкту буде за низка, жебы неґативно влияти на окружаючы дерева.