Сумар дня на 7. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 7. листопада/новембра 2023 р.

О. Ярослав Ґрич нагородженый за свою благодійну діяльніст

В жолтни/октобрі в митрополитальній катедрі св. Мариі Магдалины в Варшаві прошла XXIV Ґаля Ubi Caritas, в часі котрой нагороды за благодійну діяльніст передали орґанізациі і фундациі трьох костелів: ЕЛЕОС православной Церкви, Caritas римокатолицкого костела та Diakonia євангелицко-ауґсбуржского Костела. ЕЛЕОС нагодорил аж 10 соіб і орґанізаций. Три серед них зыскали особливый, медженародный вымір. «Долони Милосердя» нагороды ЕЛЕОС в катеґориі «Спілпраца з ЕЛЕОС» отримала Американьска Православна Церков в особі митрополиты Вашынґтона, цілой Америкы і Канады Тихона. В катеґориі «Специяльна Нагорода» выріжнено Медженародну Православну Християньску Благодійну Орґанізацию з сідибом в Бальтімор, а головну нагороду в катеґориі «Свідоцтво Милосердя» нагороджено отця Олексия Ґодуна, духовного Украіньской Православной Церкви, заанґажуваного в несіня помочы жертвам войны на Украіні. Почестну грамоту отримал тіж представник з Лемковины, о. Ярослав Ґрич, заступця директора Православного Осередка Милосердя ЕЛЕОС Перемыльско-Ґорлицкой Єпархіі і кєрівник Єпархіяльного Дому Дітины для Біженців з Украіны в Ґладышові.

Част ремонтовых прац при басені в Высовій уж єст готова, але до одкрытя атракциі іщы далеко

В марци інформували сме, што по долгых бесідах Ґміні Устя Рускє вдало ся підписати умову з будовляном фірмом, котра підняла ся реализациі ремонту басену в Высовій. Атракция од 2019 р. єст закрыта зо взгляду на недостаткы в конструкциі. Задачом выконавці єст направа конструкцийных і неконструкцийных елементів. Іде м.ін. о зміцніня конструкциі, выміну части даху, поставліня новых стін ци дотепліня в дакотрых місцях будинку, а што за тым іде – достосуваня системів вентиляциі і огріваня. Додатково роботы будут ведены тіж на зовни басену, де найде ся тзв. мала архітектура. Як інформувал війт ґміны, Збіґнєв Людвін, рада будовы одобрала уж част робіт. Дальше лишыло ся єднак вельо до зробліня, самого одкрытя обєкту не мож ся сподівати скорше як в будучым році.

Церкви в Розтоці Великій і в Матійовій будут ремонтуваны

В ґміні Лабова будут ремонтувати дві бившы лемківскы церкви, в Розтоці Великій і в Матійовій. Дофінансуваня на реновацию ґміна отримла з урядового Проґраму Одбудовы Забытків. Як передала війт ґміны Лабова, Марта Слабый, фінансова підпора дозволит сохранити культурову спадковину і привернути святыням іх давный вид. В обох храмах плянуваны сут консерваторскы, реновацийны і забезпечаючы роботы. Додатково при XV-вічній церкви в Матійовій реновация обнимат тіж мур вколо церкви і цмонтеря. В плянях єст тіж одтворіня каміннного ходника до церкви. Зас при святыні в Розтоці головным цілю реновациі єст консервяция фундаментів. На покрытя коштів плянуваных модернізаций при обох обєктах ґміна отримала близко мілийон зл.

«Солодкости в дорослости»

Жытелі міста Польковиці прошены сут на стрічу пн. «Солодкости в дорослости». Подія пройде в найблизшу пятницю 10. листопада/новембра в Польковицкым Центрі Зравотных Услуг і зачне ся о 15.00 год. В пляні стрічы єст выклад, што веденый буде дохторьом Бартошом Беднаркєвичом, індивідуальны консультациі з діабетолоґом та можливіст записати ся на баданя до ґмінного проґраму проти діабету. Участ в подіі єст дармова, але обовязуют скоршы записы.

фот. ЕЛЕОС Православный Осередок Милосердя Перемышльско-Ґорлицкой Єпархіі