Сумар дня на 7. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 7. грудня/децембра 2021 р.

Стоваришыня для Розвитку і Промоциі Підкарпатя «Pro Carpathia» просит на конференцию 

Стоваришыня для Розвитку і Промоциі Підкарпатя «Pro Carpathia» просит на онляйнову конференцию пн. «Культурова і історична спадковина Карпат як джерело сучасного локального і реґіонального розвитку – социяльный і економічный аспект». Конференция пройде в днях од 14. до 15. грудня/децембра. Стріча орґанізувана єст в рамках проєкту «Світ карпатскых розеток – діяня для захованя культуровой унікальности Карпат». Участ в конференциі єст дармова, але обовязує скорша реґістрация. Мотузок до формуляря находит ся на фейсбуковым сайті Стоваришыня.

Цікава ініциятива в Місци Пястовым

Од жолтня/октобра до грудня/децембра на обшыри ґміны Місце Пястове проходят дармовы варштаты писаня ікон, традицийной кухні, вырабляня кривульок і зілярства ведены локальныма мастерами даного ремесла. Варштаты одбывают ся в рамках осіннього циклю артистично-едукацийных стріч орґанізуваных Ґмінным Центром Культуры і Бібліотеком в Місци Пястовым. Закінчыньом проєкту буде выстава, яка пройде початком будучого рока. На ній запрезентуваны будут працы, котры возникли в часі варштатів писаня ікон.

«Енді Варголь …од початку і назад» 

3. грудня/децембра в Ґалериі Модерной Штукы БВА СОКІЛ в Новым Санчы одбыл ся вернісаж выставы пн. «Енді Варголь …од початку і назад». В подіі взяли участ Маршалок Малопольского Воєвідства Вітольд Козловскій, Ґенеральный Консуль Словацкой Республикы Томаш Кашай, радна воєвідства Марта Мордарска та директор Департаменту Культуры і Нацийональной Спадковины Маршалківсокго Уряду Малопольского Воєвідства Моніка Ґубала. Вернісаж проходил в рамках спілпрацы Музею Модерной Штукы Енді Варгола в Меджелабірцях і Ґалериі Модерной Штукы в Новым Санчы. Выставу мож обзерати до 30. січня/януара.

Татряньскій Нацийональный Парк закрыл част чорного шляку

В Татрах 4. грудня/децембра закрыли одтинок шляку в Долині Паньщыцы. Причыном єст медвід, якій рыхтує ся до зимы в реґіоні чорного шляку. Такє рішыня подал Татряньскій Нацийональный Парк, арґументуючы го тым, же близкє товариство туристів може обудити зимуючы медведі, котры пак можут мати проблемы зо сном або з тым, жебы найти ідло, а в консеквенциі можут не перетырвати зимы.

Нове чысло «Бесіды»

В середині найновшой «Бесіды» найдеме «Календар Бесіды на 2022 рік», ци реляциі з подій, якы проходили в русиньскым світі літом і на початку осени. В выданю прочытаме м.ін. статі: Петра Трохановского, про 30-літя Руской Бурсы і 10-літя нашого радия ЛЕМ.фм, про ХХІХ Лемківску Творчу Осін, Монікы Тылявской про 20-літя основаня лемківской філолоґіі, Петра Медвідя про XVI Світовый Конґрес Русинів в Креници ци дописы Андрия Ковальского пн. «Ластівочка дале нагороджувана» і «Євген Габура серед Личности Рока Польщы». Як все, найдеме в часописі і вісти в части «Новины не новины – не лем з Лемковины», Амрозове казаня, лемківскы фразеолоґізмы і анеґдоткы. Почытаме тіж выімкы з польскых і словацкых ґазет, якы дотулялют тем близкых нашій справі.