Сумар дня на 6. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 6. серпня/авґуста 2021 р.

Тогорічна 41. Лемківска Ватра на Чужыні з дармовым вступом

На початок важна інформация. Уж в тот вікенд пройде 41. Лемківска Ватра на Чужыні. На офіцийным фейсбуковым сайті Ватры явил ся комунікат, котрый подає, же тогорічный вступ на ватру буде дармо. Такє рішыня звязане єст з вымогами єдного зо спонсорів подіі. Як інформуют орґанізаторы Ватры в Михалові, Стоваришыня Лемків, в днях од 9. до 23. серпня/авґуста тр. будут вертати грошы за куплены до 4. серпня/авґуста білеты вступу і паркінґовы білеты. Єдночасно припоминают, же каждый, хто в тым часі купил білет, має заґарантуваный дармовый вступ на тогорічну Ватру на основі принципів окрисленых в реґуляміні. Просят тіж поінформувати в разі резиґнациі з участи в подіі до 7. серпня/авґуста до 12.00 год. Головный Заряд Стоваришыня Лемків щыро перепрашат за замішаня і желат доброй забавы.

ІІ Перегляд Карпатскых Фільмів в Команчы

Ґмінный Осередок Культуры в Команчы просит на суботу, 14. серпня/авґуста, на ІІ Перегляд Карпатскых Фільмів. Стріча зачне ся о годині 19.30 на пляци над ріком Ославицьом од переданя нагорід лавреатам конкурсу «Ґміна Команча очами Никыфора». В часі подіі запрезентуваны будут штырі фільмовы продукциі TV Obiektyw. Єст то серия документальных фільмів твореных в рамках проєкту «Історичный Пейзаж Підкарпатя», котры оповідают о цікавых персонах та подіях з підкарпатского реґіону. Презентуваны фільмы то «Вілежыньскій – альхімік зо Львова», «Лукасєвич- нафтяр, романтик», «Никыфор, моє друге імено» і «Як в небі, так і в Команчы». Додатково в часі стрічы одбуде ся астрономічный показ нічного неба.

Улиці Нового Санча будут сценом для Медженародного Мультімедияльного Фестівалю Штукы

Тогорічный XIII Медженародный Мультімедияльный Фестіваль Штукы – Малопольща Карпаты ОФФер пройде в Новым Санчы. Подія орґанізувана єст 13. і 14. серпня/авґуста і подібні як в попередніх роках сценом до концертів і выступів будут улиці, рынок і сандецкы плянты. Фестіваль зачне ся в пятницю о год. 20.00 концертом камеральной музикы, а пак пройде показ фільму «Остатня родина». В суботу од год. 13.00 презентувати ся будут ріжного рода театры, будут тіж спектаклі для наймолодшых. На конец зас показ фільмів «Портрет Поляка» і «Мій Никыфор». Вступне на вшыткы фестівальовы подіі дармо.

Ден і ніч в Санковій

Припоминаме, же днес в рамках підсумуваня мікропроєкту пн. «Деревяна архітектура – забытковы скарбы погранича» з Проґраму Трансграничной Спілпрацы Інтерреґ Польща – Словация 2014-2020 одбуде ся «Ден і ніч в Санковій». Подія зачне ся о 19.00 год. выступами музичных ансамблів. Запрезентуют ся Ручай, Співоча Ґрупа «Разом» і Юлия Дошна. На год. 20.10 заплянувана єст емісия фільму о культурово-природничій спадковині польско-словацкого погранича. Подіі буде товаришыла деґустация реґіональной кухні. Ціліст буде трансмітувана онляйн.