Сумар дня на 6. марця 2020 р.

Приносиме вам сумар медияльной ґрупы ЛЕМ.фм+ на ден 6. марця 2020 р.

Aктивна польско-словацка спілпраца

В Повітовым Старостві в Яслі в віторок, 3. марця, підписано штырі дальшы умовы на реалізацию мікропроєктів в Проґрамі Інтерреґ Польща-Словация 2014-2020. Першый з них буде Староство реалізувало з Піддукляньскым Едукацийным Центром во Свиднику. Плянуют утворити трансграничный туристичный пут, якій получыт Ожынну з Розтоками. Проєкт «Культурна спадковина польско-словацкого погранича; літурґічна музика» будут реалізувати римокатолицкы парохіі в Славенціні і Пряшові. Міста Ґорлиці і Бардиів зреалізуют проєкт «Познай ґеолоґічны скарбы польско-словацкого погранича» – в його рамках выдадут альбом і зорґанізуют спектакль пн. «Світло з землі». Послідній з проєктів «Мастер святой справедливости на карпатскых шляках бескідників Біч-Бардиів» ґарантує, же поставлена буде фіґура ката на рынку в Бічу, зроблена музейна експозиция в катівскій тюрмі ци упосажена реконструкцийна ґрупа. Орґанізувати будут іщы шор додатковых подій в рамках вшыткых проєктів так по польскій, як і по словацкій странах.

Неє грошы на ремонты церкви

Міністер Культуры і Нацийональной Спадковины оголосил 2. марця результаты першого набору в Проґрамі «Охорона Памятників». Роздиспонувано 104 млн зл на опіку над забытками. Дофінансуваня отримало 375 проєктів, в тым лем єден тыкаючый лемківской деревяной сакральной архітектуры, a зложеных было іщы 20 інчых внесків на ратуваня лемківскых церкви. Без підпоры державы опіка над забытковыма храмами є барз тяжка, бо предовшыткым – барз коштовна. Парохіі не сут в силі своіма середками одповідньо задбати о обєкты. Того рока практичні во вшыткых обєктах, якы старали ся о фінансову підпору од державы, не поведе ся ани продолжати зачатых робіт, ани зреалізувати новых. Лемківскым церквам грошы не признано. На 21 внесків лем єден достал одповіднє чысло пунктів, жебы отримати дофінансуваня. Грошы признано на ІІ етап монтуваня інсталяциі системы гашыня водяном гмлом типу FOG в церкви покровы Пресвятой Богородиці в Рыхвалді (дофінансуваня выносит 230 тис. зл). Є то єдна з пятьох лемківскых церкви, якы находят ся на списку ЮНЕСКО. На 375 внесків, якым признано дотацию, близко 300 то проєкты звязаны з роботами веденыма в католицкых костелах, монастырах, каплицях ци інчых подібных.

Надлісництво Дукля підкупило Станіславскых, котры хтіли оддати свободу лісови

В минулым році супружество Станіславскых зберало грошы, жебы выкупити 5 гектарів ліса на Лемковині, недалеко Мысцовой. Хтіли створити там місце свобідне од інґеренциі чловека. Хоц зобрали через інтерентову колекту більше як потрібували, то не повело ім ся зреалізувати мриі і оддати свободу лісови, так як плянували. Ліс был власністю приватной особы. Коли умова купна была праві сфіналізувана, одозвало ся Надлісництво Дукля, якє схоснувало право першенства купити ліс на іх обшыри. Станіславскы дознали ся о тым з писма од нотарияльной канцеляриі. Збіґнєв Жывєц, надлісничый з Надлісницва Дукля бесідує, што причыном выкупу ліса сут плянуваны господарчы діяня на тій обшыри. Станіславскы одзыскали грошы, котры вплатили в рамках першой раты. Тепер глядают нове місце, в котрым могли бы створити Свобідный Ліс для вшыткых – звірят, рослин і люди.

«Велопоколіньовы селиска в Малопольщы»

Округовый Музей в Новым Санчы запрашат взяти участ в ювілейній, двадцетій едициі фотоґрафічного конкурсу «Скарбы Малопольщы». Тогорічным мотивом сут «Велопоколіньовы селиска в Малопольщы». Цілю той едициі є презентация захованых паньскых і хлопскых селиск, якы находят ся на обшыри Малопольщы. Сутю проєкту єст представити стан захованя, архітектурны і культурны приметы та значыня для локального середовиска і влияня на інтеґрацию вельопоколіньовых родин. Конкурс проведеный буде в двох катеґориях: документ та артистична фотоґрафія. Найліпшы роботы вказаны будут на поконкурсовій выставі в Округовым Музею в Новым Санчы в другій половині рока.