Сумар дня на 6. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 6. лютого/фебруара 2024 р.

Меншыновый фонд буде захованый

Окремый Фонд на підпору культуры нацийональных меншын буде захованый, інформацию тоту передал на своім фейсбуковым сайті полномічный влады Словацкой Республикы Акош Горонь. Припоминаме, што кінцьом попереднього рока, словацка влада опубликувала Плян леґіслятивных задач влады СР на 2024 рік, в котрым ся рахувало зо злучыньом Фонду на підпору культуры нацийональных меншын з Фондом на підпору уменя, чым бы ся створил новый Фонд на підпору культуры. З таком пропозицийом не згаджали ся представникы меншын і з той причыны списали громадну припоминку. Неґативні о злучыню выповіл ся тіж полномічный Акош Горонь, котрый од початку січня/януара старал ся про захованя окремых фондів м.ін. через выстосуваня незгоды до міністеркы культуры, заініциювал тіж голосуваня меншынового выбору, в котрым меншыны узнесіном одшмарили пропозицию злучыня фондів і жадали зміны плянів. Взял тіж участ в бесідах з міністерком культуры в премєра. В своім вписі окрем доброй новины для меншын, подякувал вшыткым, котры заанґажували ся в захованя окремых фондів, та Міністерці Культуры за выслуханя меншын і конструктивный діалоґ.

Зимовы варштаты в Низкым Бескіді

Маґурскій Нацийональный Парк просит діти і молодіж в віку од 7 до 14 років на наступный тыжден зимовых варштатів. В тым тыжни участникы будут мочы взяти участ в природничых тематичных занятях в Едукациийно-Музейным Осередку в Крампній, котры пройдут м.ін. в четвер. Для любителів прогульок Парк зрыхтувал теренову на Кычеру. Зимову оферту варштатів має тіж Музей Дворы Карвациянів і Ґладышів. Через цілый місяц в каждый четвер і пятницю а тіж в дакотры середы, діти, молодіж і дорослы можут взяти участ в едукацийно-артистичных варштатах. В обох припадках обовязує скорша резервация, а вшыткы потрібны дрібниці найдете на сайті МНП і Музею ДКіҐ.

Місто Польковиці презначыло 850 тис. зл. на поміч особам з неполносправністю

Місто Польковиці підписало догваріня з Фундацийом «Eudajmonia» на реализацию задачы «Особистый асистент особы з непелносправністю», з котрого до кінця рока має скорыстати што найменше 35 жытелів ґміны Польковиці. Місто на реализацию задачы презначыло 850 тис. зл. В рамках проґраму особы з неполносправністю будут мочы рахувати на опіку асистента при штоденных задачах, такых як закупы ци баданя. Набір внесків о поміч уж ся зачал і буде тырвал до 16. лютого/фебруара, карту до зголошыня мож одобрати в будинку финдациі або на інтернетовым сайті фундациі. Проґрам реализуваный єст уж од штырьох років. В минулым році зголосило ся понад 90 осіб, а за орґанізаторами – в тым році чысло охочых може быти іщы більше.

ТАК для охороны природы

Загальнопольскє Товариство Охороны Птахів просит підписувати петицию для новых обшыри охороны природы в полудньово-східній Польщы. Іде головні о терены найстаршых капратскых лісів, долин потоків і жытлиск рідкых звірят і рослин. Товариство урухомило петицию до Реґіонального Директора Охороны Середовиска в Ряшові, жебы обнял охороном найціннійшы місця в Підкарпатскым – в Бєщадах, Низкым Бескіді і на погірях. Як підкрисляют орґанізоаторы ініциятивы –  часу не єст дуже, а до осягніня ціли бракує іщы понад 1700 підписів. Більше про акцию «Так для резерватів на Підкарпатю!» можете прочытати в дописі на нашым сайті, там тіж находит ся мотузок до петициі.