Сумар дня на 6. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 6. квітня/апріля 2021 р.

Апель о охорону Карпатской Пущы

Комітет Біолоґіі Середовиска і Еволюциі ПАН заапелювал до віцеміністра климату і середовиска о охорону Карпатской Пущы. Од років тырват борба медже Державныма Лісами, котры підтримуют, же серце Карпат єст в добрых руках, а науковцями ци еколоґічныма орґанізациями, котры хотят затримати вытинку дерев і охоронити цінный комплекс. Досліджыня науковців вказали, же в дост короткым часі в дикых і тяжко доступных лісах Пущы побудувано вельо лісовых доріг і пути. З той причыны в лісах ведена єст інтенсивнійша вытинка обшыри, котры до того часу трактуваны были як нехоснуваны. В апели звернено тіж увагу на выпосажыня доріг в дренажны ровы, через котры вода з гірскых джерел не єст затримувана в земли, лем тече в долины, што може вести до заливы. Проблемом єст тіж спосіб, в якій ведена єст вытинка, котра вяже ся зо стратом найстаршых дерев. ПАН підкрислят, же то як раз найстаршы дерева сут повязаны з рідкыма і загороженыма ґатунками, а вытинка нищыт іх середовиско. Авторы апелю вказали тіж можливы розвязаня, котры будут хоронити перед втратом природничых валорів Карпатской Пущы, як напр. основаня резерватів на обшыри плянуваного Турніцкого Нацийонального Парку, заказ вытинкы дерев в пропонуваных резерватах та будува лісовых доріг і пути, ци выпрацуваня консенсусу в справі охороны середовиска, де прожывают загорожены ґатункы.

«Одкрый свій скарб»

Нацийональный Центр Культуры просит до ІІІ едициі конкурсу «Одкрый свій скарб». Нагороджены будут найбарже інтересуючы едукацийны діяня звязаны з локальном спадковином і підтримуваньом культуровой достоменности. До конкурсу можут быти зголошуваны діяня реализуваны протягом остатніх трьох років, тзн. од 1. січня/януара 2018 р. до 15. марця 2021, особливо звязаны з нематерияльном спадковином нацийональных, етнічных ци реліґійных меншын, як і материяльном і природничом спадковином та едукацийом в обшыри громадяньской одповідальности. Для лавреатів і выріжненых зрыхтувано дві нагороды – участ в варштатах і занятях повязаных з темом інтерпретациі і маркетінґу спадковины, якы закінчены будут вручыньом дипломів, і участ в вебінарах. Зголошыня треба слати до 25. квітня/апріля тр.

Новы роверовы пути в ґорлицкым повіті

Добра новина для любителів роверовых подорожы в ґорлицкым повіті. Ґміна Ґорлиці отримала 3 млн зл дотациі в рамках Урядового Фонду Локальных Ініциятив. Грошы будут переданы на розбудову біциґльовой інфраструктуры на обшыри ґміны. Неодолга зачне ся будова роверовой стежкы на одтинку Шымбарк Каштель – Ґміна Ропа та пішо-роверовой стежкы в Кобылянці і Квятоновицях.

Сапсаны в Татрах

На конец інформация з Татряньского Нацийонального Парку. На східній страні Костельця явили ся сапсаны, барз рідкій і хороненый в Польщы ґатунок соколів. З той причыны дирекция Парку рішыла закрыти до кінця липця/юлия туристичны дорогы і пути, котры ідут од Комина Древновского по Кулюар Заруского. За природниками з ТНП, до кінця липця/юлия молоды соколы винны безпечні лишыти гніздо, а до того часу не повинно ся ім перешкаджати.