Сумар дня на 6. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 6. грудня/децембра 2024 р.

Днес конференция «Талергоф. Першый лаґєр інтернуваня в Европі»

Днес в Каштели в Шымбарку проходит наукова конференция пн. «Талергоф. Першый лаґєр інтернуваня в Европі». Подія проходит в рамках лемківскых упамятнінь 110. річниці інтернуваня Русинів. На конференцию просят Стоваришыня «Руска Бурса» в Ґорлицях та Музей Дворы Карвациянів і Ґладышів в Ґорлицях. Вступне на подію дармо. Конференция єст тіж нажыво трансмітувана на каналі YouTube lem.fmTV од год. 10.30. Детальный проґрам найдете на нашым портали. Цілю конференциі єст не лем упамятнити жертвы Талергофу, але тіж выкликати шыршу рефлексию над історичныма механізмами, котры довели до переслідуваня. Серед прелеґентів находят ся выдатны бадачы і реґіоналисты, котры представлят ріжны аспекты драматичных подій звязаных з Талергофом і іх влияня на лемківску соспільніст і шыршый історичный контекст Серединно-Східньой Европы.

Просиме на централны святкуваня Дня Русинів Польщы!

Заран на Лемковині одбудут ся центральны святкуваня Дня Русинів Польщы. Каждого рока 5. грудня/децембра празднуєме наше нацийональне свято для упамятніня віче во Фльоринці з 1918 році, якє пак дало початок Рускій Народній Республиці Лемків. В тым році центральны святкуваня проходят 7. грудня/децембра. Для упамятніня нашых предків, якы основали Руску Народну Республику Лемків, споминовы подіі зачнут ся стрічом во Фльоринці о год. 14.30 в долинці при грекокатолицкій церкви. Дальше, як каждого рока, будут продолжаны в Рускій Бурсі в Ґорлицях. В рамках музичного проґраму выступлят ансамбль Терочка та Петро Трохановскій, котрый заспіват при акомпаніяменті Ігоря Трохановского. Просиме до спільного святкуваня!

Лемківскы копальникы долучат до мундуровых служб на св. Горі Ґрабарці

В середу 4. грудня/децембра святкувана была Барбурка. В тым році празднуваня Дня Копальника в KGHM Польска Мід зачали ся уж в патницю 29. листопада/новембра. Вручены были державны і бранжовы выріжніня. Міністер Промыслу Мажена Чарнецка признала м.ін. Ступін Ґенеральночо Почестного Копальничого Директора Православному Капелянови Копальництва о. прот. Богданови Репелі. В неділю 1. грудня/децембра о. Репела та члены Православного Копальничого Братства – Мариян Шкурат, Любомир Горощак і Адам Гербут зложыли офіцийну візиту владыці Юрийови, Архієпископови Вроцлавско-Щеціньской Єпархіі. Стріча одбыла ся в сідибі вроцлавской катедры. Порушено на ній квестиі тыкаючы шыроко пониманой діяльности нижньошлезского Копальничого Братства в копальничых закладах KGHM Польска Мід. Бесідувано о істориі і специфіці працы копальників та омовлено пляны на будуче. Копальниче Братство задеклярувало охоту участи в заплянуваных на будый рік святкуванях Преображыня Господньохо на св. Горі Ґрабарці, долучаючы до вшыткых мундуровых служб. Владыка Юрий поблагословил ініциятиві і уділил благословліня Нижньошлезскому Православному Братству з дньом ближучого ся свята Барбуркы. В сам ден Барбуркы в інтенциі вшыткых копальныків правлене было богослужыня в православній парохіі св. Тройці в Любіні.

Польковицкій Повіт дофінансувал новы бізнесы

В тым році Польковицкій Повіт дофінансувал одкрытя понад 60 новых фірм. Вчера чекы одобрало дальшых 14 осіб з ріжных бранж: косметичной, будовляной, ґастрономічной, фільмовой ци здравотной. Символичны чекы вручали Польковицкій Староста Каміль Цюпак і директор Повітового Ураду Працы Мажена Жешовска. Дофінансуваня в высокости 40 тис. злотых отримали особы, котры зложыли внескы і сполнили окрислены вымогы. Стріча была тіж нагодом до мериторичного прирыхтуваня будучых підприємців. Чекы отримали жытелі м.ін. ґмін: Польковиці, Пшемків і Хоцянів.