Сумар дня на 6. грудня/децембра 2019 р.

Приносиме вам сумар медияльной ґрупы ЛЕМ.фм+ на ден 6. грудня/децембра 2019 р.

Ци пєса ТАД достане нагороду?

Інсценізация рыхтувана Театром Александра Духновича в Пряшові «Пісковиско» нашла ся серед 14 номінуваных до Преміі Академіі Театральных Творців. То нагорода основана рік тому з ініциятивы фахівців в практичній і теоретичній области театру, цілю споіти особливости словацкой театральной культуры з обшыри творчости, театральной наукы, критикы і істориі. Пєса «Пісковиско» русиньского театру зрыхтувана была на основі драмы Михала Вальчака, польского драматруґра, в режысериі Браньо Мазуха. Головны ролі грают Зденка Кваскова та Івета Фейкова. На сайті Академіі Театральных Творців «Пісковиско» є позитивні оцінюване, як стильово чыста інсценізация, котра дає публиці імпульс до роздумуваня о важности людской комунікациі. Критикы звертают увагу, што є то пєса, котра притігат молоду публику, має елементы модерности, акторской чыстоты і предуманой режысерийной концепциі. Жырі замітує ій єднак, што непотрібні вчас інсценізациі акторкы мают безпосередній контакт з публиком – ведут анкєту. Лавреат буде оголошеный 13. грудня/децембра вчас святочной ґалі в Синім Сальоні Словацкого Народного Театру.

Oдышол героічный душпастыр словацкых і чешскых грекокатоликів – єпископ Йоан Євген Кочыш

В ночы з 3. на 4. грудня/децембра вмер на 93 рокы в Домі свв. Космы і Даміана в Пряшові емеритуваный помічный владыка пражского апостольского еґзархату, титулярный єпископ арбіттскій, єпископ Йоан Євген Кочыш. Владыка Кочыш был героічным душпастырьом словацкых і чешскых грекокатоликів. Был свідком преслідуваня грекокатолицкой Церкви в Чехословациі, все остаючы Ій вірный. Парократні был судженый. В конспірациі вчыл реліґіі та душпастырювал. В 1968 р. был в Брні таємні хіротонізуваный на єпископа, был тіж м.ін. особистым секретарьом інтернуваного владыкы, блаженного Василя Гопка. Через 21 років был церемонялом і урядником грекокатолицкой куріі в Пряшові. Од 1993 р. был директором, а пак од 1996 р. ґенеральным вікарийом новооснованого пражского апостольского еґзархату. В 2004 р. был условно рукоположеный на єпископа – sub conditione, зато, што на єпископа был высвяченый в підземній Церкви. Од 2006 р. был на пенсиі. Похорон владыкы Кочыша пройде 9. грудня/децембра в катедральным соборі св. Йоана Крестителя в Пряшові, єпископ буде похороненый в крипті під катедром.

В Ґожові засядут разом Лемкы, Буковиньскы Ґуралі, Полешюкы, Украінці, Львівякы, Вільнюкы, Жыды і Ромове

В суботу 7. грдуня/децембра, в Ґожові пройде 13. Велия Культур і Народів. Вчас стрічы під гаслом Веліст в Єдности при святочным столі засядут представникы нацийональных і етнічных меншын, будут: Лемкы, Буковиньскы Ґуралі, Полешюкы, Украінці, Львівякы, Вільнюкы і Жыды. Ґаздами будут Ромы, якы в 2007 році започаткували тоту традицию. Подія сталя ся в Ґожові не лем символом приближаючого ся Різдва, але і інтеґрациі жытелів реґіону. При столах стрічают ся представникы старшого, молодшого поколіня, част приходит облечена в народны лахы, є спільне співаня коляд і деґустуваня традицийных святочных страв. Стріча одбуде ся в сали Містецкого Центра Культуры Заварцє, початок 15.00 год., вступне дармо.

На ратунок лісам

Ініциятива Дикы Карпаты утворила петицию направлену на Директора Реґіональных Державных Лісів в Коросні Ґражыны Заґробельной та Директора Реґіональной Дирекциі Охороны Середовсика в Ряшові Войцєха Вдовіка, в котрій протиставлят ся плянуваній на 2020 рік вытинці фраґменту Карпатской Пущы при граници з Бєщадскым Нацийональным Парком. В плянах є вытяти 30 гектарів Пущы в Надлісництві Ступосяны, де роснут 150-літні букы і ялиці ци явір, котрый винен быти памятником природы. Разом плянуване є вытяти на продаж 4 тис. кубиків дерева. Петицию може підписати каждый громадянин. Дикы Карпаты внескуют сотворити сіт хороненых обшыри, котра дозволит заховати екосистемы з сусідства Бєщадского Нацийонального Парку наступным поколіням.