Сумар дня на 6. червця/юнія 2022 р.

Приносиме вам сумар медияльной ґрупы ЛЕМ.фм+ на ден 6. червця/юнія 2022 р.

Пляны модернізациі доріг в ґміні Санкова выкликали контроверсиі

Ґміна Санкова поінформувала 3. червця/юнія, же до ґміны трафит близко 11 млн злотых з проґраму Польскій Лад. В рамках першого проєкту ґміна плянує выремонтувати 17 км ґмінных доріг в Вапенным, Мацині Великій, Бортным, Рыхвалді, Бодаках, Ропици Рускій, Ясюнці, Радоцині і Чорным. Другій проєкт обнимат перебудову одтинка ґмінной дорогы Санкова-Сяры і розбудову комунікацийного систему при уряді ґміны і школі в Санковій. Дофінансуваня має быти схоснуване і на модернізацию повітовой дорогы Сяры-Рыхвалд. Рішыня ґміны одраз выкликали контроверсиі. Як написала на своім фейсбуковым профіли Моніка Шнайдерман, ведуча выдавництва Чарне, авторка книжкы о лемківскым селі Воловец пн. «Порожній Ліс», змодернізуваны будут дорогы ідучы через найкрасшы долины Бескіду – з Ясюнкы до Радоцины Выжньой, з Чорного на Долгє, а єдином візийом туристикы, яку має ґміна Санкова, єст масова, змоторизувана туристика. Шнайдерман пише, же нихто не звідал жытелів ци потрібна ім тота модернізация, ци потрібуют інчых річы, напримір світловоду. На модернізациі доріг мали бы стратити і туристы, якы од років приходят в тоты місця для іх тишы і природничой красы.

Новы книжкы про фразеолоґію і словництво та словотворіня лемківского языка

В текучым році явили ся дві публикациі, якы можут быти основом до вчыня лемківского языка. Іх авторком єст долголітня учытелька лемківского языка, Мирослава Хомяк. Книжкы тыкают фразеолоґіі і словництва та словотворіня лемківского языка. Обі были печатаны в 2022 році Лемківскым Ансамбльом Пісні і Танця «Кычера» з Ліґниці. Перша з публикаций має наголовок «Волк сытый і уця ціла». То підручник дедикуваный для учеників основной і середньой школы, якій приближат тайны фразеолоґіі в лемківскым языку. Другом з книжок єст публикация тыкаюча словництва і словотворіня в лемківскым языку. Так само як книжка про фразеолоґізмы, єст она направлена на учеників основной і середньой школы.

Крениця отримат высокє дофінансуваня

Як подал бургомайстер Пьотр Рыба, в рамках орґанізациі в Креници части змагань Европейскых Ігр 2023 Краків-Малопольща, місто отримат парудесятмілийонове дофінансуваня. За близко 25 млн злотых Крениця побудує паркінґы на Чорным Потоці і при Уряді Міста, выремонтує очыщальню, побудує резервуары воды до питя і перебудує дакотры улиці. Близко 18 млн достала Крениця на ремонт Ледовой Галі. Додатково 5 млн зл піде на розбудову загорід на Парковой Горі, і близко 10 млн на будову амфітеатру.

Апель до Ясюнчан

Припоминаме, же в остатнім номері «Бесіды», а тепер і на нашым портали lem.fm, запознати можете ся з одозвом Михала Гайтко до Ясюнчан, значыт до вшыткых, якых коріня выходят з того лемківского села, якє находит ся медже Кривом а Чорным (пару кілометрів од Ґладышова). Автор одозвы, Михал Гайтко, на даный момент кінчыт писати книжку о істориі Ясюнкы і роду Гайтко, але радо прийме кажду інформацию ци то фотоґрафію, котра могла бы ся найти в книжці. Потрібне єст лем Ваше заанґажуваня, родженых в рідній Ясюнці, або потомных, што в своіх родинных архівах быти може переховуют цінны інформациі. Михалови Гайтко повело ся по прешло 30 роках одзыскати рідну землю, на котрій хоче поставити пропамятный крест, під котрым на таблици выписаны были бы вшыткы ясюнчаньскы роды до 1947 р. І ту потрібна єст поміч – найбільше фінансова, бо декотры річы вымагают фінансового накладу. Кєд сут охочы, просит ся о контакт під майльом: michalhajtko@wp.pl. Одкрытя памятника – кєд добрі піде – заплянуване єст меньше-більше о рік.