Сумар дня на 5. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 5. вересня/септембра 2024 р.

Піше поломництво зо Ждыні до Ґорлиц

Днес вышло піше поломництво зо Ждыні до Ґорлиц з нагоды заранійшнього праздника священномученика Максима Ґорлицкого. Того рока минят 110 років од розстріляня австрийскыма жандармами о. Сандовича, мученика за православну віру. Днес о 5.00 год. рано в церкви Покровы Пресвятой Богородиці в Ждыни была одслужена Літургія, а пак поломникы путуют до Ґорлиц через Ждыню, Ґладышів, Маластівску Маґуру, Прислоп, Новицю, Білянку, Шымбарк і Ропицю Польску. Днес о 17.00 год. в ґорлицкым храмі буде служена Всеночна. Заран, в праздничный ден, одслужена буде ранішня Літургія о 6.00 год., пак о год. 8.30 буде акафист перед мощами св. Максима, о 9.45 привитаны будут владыкы і о 10.00 год. зачне ся головна Божеска Літургія. Тогорічны святкуваня сут повязаны і з 100 річницьом отриманя через православну церкву в Польщы автокефалиі.

Церков в Квятони буде мала модерный протиогньовый систем

В Ґорлицкым Старостві підписана была умова о дотацию на проведіня прац повязаных з протиогньовым забезпечыньом враз з конечныма будівляно-консерваторскыма працами в памятковій церкви в Квятони. Квятоньска церков од 2013 р. є вписана до списку UNESCO. На тоту ціль до ґміны Устя Рускє трафило 900 тис. зл. З тых грошів буде замонтуваный модерный протиогньовый систем церкви. То послідня з памяток UNESCO в ґорлицкым повіті, котра такого систему не мала. Працами займут ся дві фірмы – єдна од протиогньового систему, а друга од ремонтовых прац. Роботы мают зачати ся в половині того місяця, а закінчат ся іщы перед зимом. Квятоньска церков є рахувана як єдна з найкрасшых лемківскых церкви. Каждого рока притігат вельо туристів.

Лемківскє співаня на Высокій коло Рудной

В суботу, 14. вересня/септембра на Высокій коло Рудной одбуде ся дальша едиция подіі під назвом «Лемківскє співаня», якой головным орґанізатором сут лемківскы жытелі Высокой і ґміна Рудна. Подія зачне ся о год. 15.15 хороводом. Пак од 16.00 будут концерты. В проґрамі передвиджено выступы лемківскых і заприязненых ансамблів, а то м.ін. Розтокы, Кычеры, Сасанкы, Дамира, Зазулі і Воронів. Подібні як влони, вчас подіі буде мож посмакувати традицийну лемківску кухню зрыхтувану місцевыма ґаздынями, а тіж ґрузиньску кухню од заприязненых кухарів. Будут і додатковы атракциі, в тым про діти. Подія одбуде ся в центрі села, в місцевым парку. Вступне на подію дармо.

Войсковій шпыталь в Пряшові буде служыл тіж цивільным пациєнтам

Войсковый шпыталь в Пряшові буде в основі служыл тіж цивільным пациєнтам. Прибудут в ним новы одділы, робочы місця і буде мал свою лябораторию. Премєр Роберт Фіцо, міністер обороны Роберт Калиняк і міністерка здоровля Зузана Долінкова в звязку з будовом нового шпыталя, єднали о тым в Пряшові. Як повіл словацкій премєр, через три рокы влада зможе перезначыти 550 мілийонів евро на побудуваня цілком нового шпыталя в Пряшові.