Сумар дня на 5. січня/януара 2024 р.

Приносиме вам сумар медияльной ґрупы ЛЕМ.фм+ на ден 5. січня/януара 2024 р.

Полномічный влады СР про нацийональны меншыны выразил незгоду на зліквідуваня меншынового фонду

Як сме скорше інформували, словацка влада в грудни/децембрі опубликувала Плян леґіслятивных задач влады СР на рік 2024, в котрым на червец/юній є наплянувана Пропозиция закону о Фонді на підпору культуры, котрой ґестором має быти Міністерство Культуры. Принятьом такого закону перестали бы істнувати два актуальны фонды, в тым фонд на підпору культуры нацийональных меншын. Проти зліквідуваню меншынового фонду выникнула уж громадяньска петиция. Свою незгоду на зліквідуваня меншынового фонду выразил вчера, 4. січня/януара, і новый полномічный влады Словацкой Республикы про нацийональны меншыны Акош Горонь. Інформацию помістил на офіцияльным сайті полномічного в социяльній сіти. Полномічный Горонь так само спомянул, же буде апелювал, жебы робоча ґрупа уж зряджена міністерством, в котрій сут участны і представникы нацийональных меншын, была залучена до приправы новелизациі.

Музей Лемківской Культуры фурт закрытый

Музей Лемківской Культуры в Зындрановій в січни/януарі 2024 р. дальше остає закрытый для одвиджаючых. Як поінформувал Музей, закрытый остає в звязку з браком рішыня Міністра Внутрішніх Справ і Адміністрациі в обшыри дофінансуваня в 2024 р. задач, о котрых бесідує закон о нацийональных і етнічных меншын та реґіональным языку, в обшыри цільовых дотаций. На днес неє ниякых інформаций про тото, ци цільова дотация на Музей Лемківской Культуры буде в тым році признана.

Новы автобусовы получыня в ґорлицкым повіті

Недавно інформували сме, што Рада Ґорлицкого Повіту підняла кінцьом минулого рока схваліня про буджет на 2024 рік і принятя Вельолітньой Фінансовой Проґнозы Ґорлицкого Повіту. На своім LV засіданю Рада підняла схваліня і в другых справах, м.ін. выражыня згоды на догваріня Ґорлицкого Повіту о свідчыню услуг в обшыри публичного колективного транспорту в 2024 р. на комунікацийній леніі: Ґорлиці – Сяры – Санкова – Ропиця Выжня – Маластів – Ґладышів – Смерековец – Ждыня.

Новый соспільный проєкт Містно-Ґмінной Публичной Бібліотекы в Польковицях

Ґміна Польковиці і Містно-Ґмінна Публичнна Бібліотека в Польковицях просят до участи в новым проєкті бібліотекы пн. «Клюб Мам». Орґанізацийна стріча пройде 13. січня/януара, обовязуют скоршы записы. Думкодавці рахуют на заінтересуваня зо стороны жен досвідченых материнством, будучых в тяжы, і молодых мам. За словами віцебургомайстер ґміны до социяльных справ Евы Ковалік, клюб має быти місцьом стріч жен, котры выховуют діти і хотіли бы поділити ся своіма досвідчынями, страхами, але і ся розвивати. Як оцінила, єст то дост цікава ініциятива, зато же все то місце, де мож ся стрітити, побесідувати, познати особы, котры мают подібны заінтересуваня і подібны проблемы, бо служыт тото розвиткови каждой з осіб, котра там приходит.

Христос ся Раждає!

А на конец днешніх новин хочеме передати святочны желаня вшыткым тепер празднуючым Рождество Христове, котре припадат за юлияньскым каленарьом в найблизшу неділю 7. січня/януара. Вшыткым Вам з нагоды Різдва Христового желаме вельо радости, спокою, пошаны і зрозумліня. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях.