Сумар дня на 5. січня/януара 2022 р.

Приносиме вам сумар медияльной ґрупы ЛЕМ.фм+ на ден 5. січня/януара 2022 р.

Літературный Конкурс Мариі Мальцовской

В минулым році проходила 8. едиция Літературного Конкурсу Мариі Мальцовской. Подібні як то было і в попереднім році, з причыны продолжаючой ся пандеміі і повязаных з ньом рестрикций, і того рока результаты конурсу оголосили лем онляйн. Перед парома днями оголосили, што нагороду за найліпшый, дотепер непубликуваный твір од русиньского автора зо Словациі в Конкурсі Мариі Мальцовской отримала писателька Людмила Шандальова. Представила она поетичну творчіст. Другє місце признали Владиславови Сивому за драматичный твір, а третє місце жырі признало Елені Хомовій-Гріньовій. До конкурсу в сумі зголосило ся девятьох авторів, окрем выміненых іщы Штефан Смолей, Мария Шмайдова, Мирослав Жолобанич, Мілян Ґай, Гелена Ґіцова-Міцовчынова та Юрко Харитун. Людмила Шандальова лавреатрком конкурсу остала уж другій раз. Перше місце заняла іщы в 2019 році, а за дебют в 2015 році была оцінена Премійом Александра Духновича за русиньску літературу.

Асфальт – для кого?

На сайті Бюлетину Публичной Інформациі Ґміны Крампна явило ся офіцийне повідомліня про завершыня доказового поступуваня в справі выданя рішынь о середовисковых обставинах для ініциятивы пн. Перебудова ґмінной дорогы Граб-Вышоватка-Долгє. Іде о повекшыня – пошыріня і выасфальтуваня дорогы в єй части, яка находит ся в підкарпатскым воєвідстві. Є то част Лемковины, котра в великій мірі є незамешкана, а тым самым найбарже дика і спокійна. Вельох уважат ю за єдну з найкрасшых долин Низкого Бескіду. Автором писма є війт Ґміны Крампна Казімєж Міськович. Інформує він в документі, што неє конечности провести оціну влияня той інвестициі на середовиско. Подля еколоґа Рышарда Бабяжа то не до принятя. Подає він, што одтинок, котрый має быти выремонтуваный, єст важный не лем для розвитку опертого на сучасній зрівноваженій туристиці, але і для захованя контакту Маґурского Нацийонального Парку з сусіднім тереном. Што веце, околиці перегыбы, до котрой має быти положеный асфальт, сут важным еколоґічным коридором, в будучности до прилучыня до сіти обшыри Натура 2000. Взятый до увагы єст тіж як еколоґічный коридор в проєкті Пляну Охороны Маґурского Нацийонального Парку. Документация справы доступна є в сідибі Уряду Ґміны Крампна до 11. січня/януара.

Додатковы автобусовы получыня в малопольскым воєвідстві

В липци/юлию тр. в малопольскым воєвідстві плянуют урухомити 26 додатковых автобусовых получынь публичного хосну в рамках Фундушу Розвитку Автобусовых Перевозів. Є то звязане з тым, што в 2019 році вошла в жытя устава о Фундушы Розвитку Автобусовых Перевозів о характері публичного хосну. Од часу покликаня реченого Фундушу в 2022 році малопольскє воєвідство урухомит найвеце получынь публичного хосну, медже інчыма будут то курсы на трасах: Высова-Тарнів ци Тарнів-Заклічын-Новый Санч. Додатковы получыня мают злегшыти доступ до транспортовых услуг головні жытелям меншых місцевости воєвідства.

Христос ся Раждає!

Уж заран вірны Східніх Церкви, што хоснуют юлияньскій календар, будут празднувати Святый Вечер, велию Різдва Христового. Вшыткым нашым слухачам, для котрых будут то святочны дни, желаме Божой благодати, щестя, здравля і вшыткого найліпшого в новым 2022 році. В нашым радию од заране будете мочы чути колядкы і святочны авдициі, а тіж специяльны віншуваня награны цілым ансамбльом радия ЛЕМ.фм. Просиме слухати. Христос ся Раждає!