Сумар дня на 5. мая 2023 р.

Приносиме вам сумар медияльной ґрупы ЛЕМ.фм+ на ден 5. мая 2023 р.

Будова лыжной стациі в Шавнику штораз ближе

Ґміна Мушына фурт старат ся о лыжну стацию в Щавнику. Актуально Ґміна глядат стратеґічного інвестора. Кєд выголошеный конкурс оферт ся поведе, то будова новой лыжной стациі в Шавнику буде штораз ближе. Як подал бургомайстер Мушыны Ян Ґольба, інвестор буде мусіл выложыти ок 70 млн злотых – што найменче 50 млн на інвестицию і ок. 20 млн на звекшыня капіталу. То даст можніст выкупити ґрунты і створити реляцию, в котрій стратеґічный інвестор буде властительом землі, яка перше належала до громадянина Німец, а ґміна Мушына буде в тым мала участ своіма теренами. Ґміна буде могла продати, дати в аренду або внести апортом тоты терены для діяня вытягу. Разом під стацию ма быти переданых 220 га. Не знатя, коли акуратно вытяг міг бы быти одкрытый, кєд же остаточне рішыня залежыт од оціны Реґіональной Дирекциі Середовиска.

Ремонт повітовой дорогы в Ропі

Припоминаме, што в будучым тыжни зачне ся ремонт повітовой дорогы в Ропі. Повітовый Заряд Доріг в Ґорлицях поінформувал, што в звязку з початком ремонту дорогы нр 1505К в місцевости Ропа од понеділька 8. мая од 10.00 год. ремонтуваный одтинок буде закрытый для руху. Завершыня робіт єст плянуване на конец мая тр. Обізд єст вызначеный державном дорогом нр 28 і воєвідском дорогом нр 981.

Варголь на Медженародным Фестівалю Фотоґрафіі

Ближыт ся 22. едиция Медженародного Фестівалю Фотоґрафіі, котрый одбуде ся Лодзи в днях од 15. до 25. червця/юнія. Темом тогорічной едициі Фотофестівалю буде надія. В фестівальовым центрі Арт_Інкубатор будут выставлены одважны працы медженародных артистів, што презентуют ріжны формы опору, спертя і спілпрацы в державах Европы, Полудньовой Америкы і на Близкым Сході, м.ін. історию корінных інкаскых і андийскых соспільности, котры выповіли войну концернови Coca-Colа, ци історию бунту, якій зачали мексиканьскы громадянкы, а в результаті якого з міста Черан выгнаный был єден з небезпечных наркотиковых картелів. В проґрамі находит ся і вельо інчых выстав, в тым тота пн. «Area: Штука на паркєті. Варголь, Баскія і С-ка». Динамічны і одважны фотоґрафіі Волькера Гінза приближают історию леґендарного нічного клюбу, діючого в 80. роках ХХ ст. на улицях нюйоркского Нижнього Мангатану. Місце тото што шіст тыжнів переходило спектакулярну переміну, а гості приходили в облечыню навязуючым до головных госел, такых як «Ідло», «Мода» ци «Віра». На презентуваных знимках мож буде видіти звізды світовой артистичной сцены, м.ін. Енді Варголя, Жан-Мішель Баскія, Мадонну ци Ґрейс Джонс.

Остатня шанса зложыти внесок о нагороду ім. Владислава Оркана

Іщы до середы 10. мая тр. любителі танця, фольклору і реґіональных традиций можут складати внескы о нагороду за выдатны осягніня в обшыри артистичной і культуральной діяльности локальных спільнот Малопольщы. Нагорода ім. Владислава Оркана має на ціли сперти артистичны середовиска, якы діют в обшыри традицийной реґіональной культуры.Окрем реґіональных ансамблів в конкурсі можут брати участ і інчы ґрупы, якы в своій діяльности берут з культуровой дідовизны поколінь, м.ін. локальны інституциі занимаючы ся охороном нематерияльной спадковины. Лавреаты выбраны Зарядом Малопольского Воєвідства отримают статуі і фінансову нагороду.