Сумар дня на 5. марця 2025 р.

Приносиме вам сумар медияльной ґрупы ЛЕМ.фм+ на ден 5. марця 2025 р.

Світовой Рады Русинів стрітила ся в Румуніі, головном  темом засіданя была орґанізация XVIII Світового Конґресу Русинів

1. марця в селі Пожоґа, в Румуніі прошло 5. меджеконґресове засіданя Світовой Рады Русинів, получене зо святкуваньом 25-літя Культурного Товариства Русинів Румуніі і праздником Дня Русинів Румуніі. Головном темом засіданя была орґанізация XVIII Світового Конґресу Русинів, котрый в тым році пройде в Букарешті в днях 12.-15. червця/юнія в будинку румуньского парляменту. Як передал председа конґресу, Штефан Лявинец, добесідувано протокол орґанізациі конґресу ци листу почестных гости. Єдным з пунктів стрічы была і деклярация спілпрацы зо СКР од Саскачеваньской Асоцияциі Русиньской Культуры з Канады і Русиньского Літературно-Культурного Общества з Підкарпатя, єднак буде то квестия іщы дискутувана на остатнім засіданю СРР, ден перед XVIII СКР. Усталено і критериі признаваня двох нагорід: Преміі імени Василя Турока-Гетеша і Нацийональной Преміі за русиньскє уменя імени Івана Манайла Pro Arte Ruthenorum. Більше на тоту тему чытайте на нашым портали.

Петиция противляюча ся будові видоковой вежы на Горі Явор

В лютым/фебруарі інформували сме, што Надлісництво Лося вєдно з партнерами старат ся о дофінансуваня проєкту, в рамках котрого м.ін. хотят выбудувати видокову вежу на Горі Явір. Справа выкликала порушыня серед лемківской соспільности, для котрой Гора Явір єст святым місцьом – місцьом реліґійного культу, але тіж серед жытелів ґміны Устя Рускє ци туристів, котрым Низкій Бескід єст особливо близкій. Надлісництво Лося не сконсультувало свойой думкы будовы видоковой атракциі в Высовій. Додатково, окрем самой вежы хоче зорґанізувати в сусідстві едукацийну історично-природничу стежку. З той причыны на сайті petycjeonline.pl явила ся петиция противляюча ся будові видоковой вежы, авторства Любителів Горы Явір, котры апелюют до Надлісництва лишыти думку реализациі проєкту в тій локализациі. Як мож чытати в поясніню, «Плянувана інвестиция Надлісництва Лося (…) не лем перечыт характерови того місця, але тіж єст загорожыньом для його сакрум». Авторы звертают тіж увагу на факт, што розбудуваня туристичной інфраструктуры причынит ся до збільшеного туристичного руху, а то може довести до затрачыня спокійного характеру того місця, котре вартат захованя для будучых поколінь. Мотузок до петициі найдете в днешнім сумарі, або по вписаню госла «Sprzeciw wobec budowy wieży widokowej na górze Jawor».

Буде автобусове получыня з Хоцянова до Польковиц

Як сме подавали, власти Хоцянова выповіли ґміні Польковиці порозумліня, котре тыкат спільной орґанізациі ґрупового транспорту. З той причыны польковицкы дармовы жолты автобусы леніі номер 23, 23А і 25 од початку марця перестали курсувати. Польковицкій повіт має уж єднак розвязаня. В рамках бесід з приватным перевозником, місту удало ся достосувати комерцийну оферту до актуальных потреб. Жытелі будут мочы безпечні доіхати до школы ци роботы. В рамках спілпрацы з перевозником плянуване єст м.ін достосуваня через хоснуваня більшых автобусів. Актуально доступны сут 4 получыня, єднак місто буде моніторувало фреквенцию і кєд буде така потреба  – дойдут наступны получыня. Тым самым повіт на ниякій з орґанізуваных леній не реализує дармовой комунікациі. Місто має уж порозумліня з ґміном Польковиці што до урухомліня повітовой леніі публичного хоснуваня і підняло діяня цілю одкрытя получыня медже Польковицями а Ґлоґовом.