Сумар дня на 5. лютого/фебруара 2025 р.

Приносиме вам сумар медияльной ґрупы ЛЕМ.фм+ на ден 5. лютого/фебруара 2025 р.

Лемківска репрезентация в Соймі

Вчера в польскым соймі одбыла ся конференция з нагоды 20. річниці істнуваня уставы о нацийональных і етнічных меншынах. Конференцию попередил вернісаж выставы присвяченой вшыткым вычысленым в уставі меншынам, a тоту одкрыл Маршалок Сойму Шымон Головня. Лемківску меншыну репрезентували на подіі члены соспільных орґанізаций – Стоваришыня Лемків репрезентували проф. Олена Дуць-Файфер, Євген Габура, Богдан Копча та Севериян Косовскій, якій выступувал гын тіж в роли репрезентанта Стоваришыня «Руска Бурса» в Ґорлицях. Музей Лемківской Культуры в Зындрановій репрезентувал Богдан Ґоч. В конференциі участ взяли експерты і репрезентанты меншын, а тіж посланкы і послы, якы бесідували о значыню уставы, єй аплікациі, проблемах ци конечности новелизациі записів по 20 роках функцийонуваня уставы. Вельо місця посвячене было значыню едукациі в захованю і розвитку культурной достоменности меншын.

Малопольща з грошами на ремонты доріг

Близко 180 млн зл дофінансуваня з Урядового Фундушу Розвитку Доріг буде переданых того рока до ґмін і повітів в Малопольщы. Завдякы тым середкам буде побудуваных 124 км локальных доріг. Такы даны подал на пресконференциі Кжыштоф Кленчар, малопольскій воєвода. Близко 108 млн зл отримают ґміны на задачы звязаны з будовом і ремонтами ґмінных доріг, а 72 млн зл трафит до повітів. Воєвода підкрислил, же вшыткы єдиниці територияльного самоуряду, котры аплікували о середкы з Урядового Фундушу Розвитку Доріг, тоты середкы отримают.

ІХ сесия Рады Ґорлицкого Повіту

В четвер 30. січня/януара одбыла ся ІХ сесия Рады Ґорлицкого Повіту, вчас котрой радны омовили основны квестиі, котры тыкают функцийонуваня повіту. Єдным з головных пунктів засіданя была анализа реализациі статутовых діянь через поєдны комісиі та дискусия над текучымя вызванями самоуряду. В часі стрічы порушено тіж справы звязаны з дороговом інфраструктуром, едукацийом та охороном здоровля в реґіоні. Рада обрадувала і над буджетовыма і інвестицийныма плянами на найблизшый період. Участ в стічы взали так представникы самоурядовых власти, як і запрошены гості. Полный справопис з сесиі і детальны рішыня мож найти на сайті Повітового Староства в Ґорлицях.

Брак публичного транспорту медже Хоцяновом а Польковицями

Власти Хоцянова выповіли ґміні Польковиці порозумліня, котре тыкат спільной орґанізациі ґрупового транспорту. Означат то, же польковицкы дармовы жолты автобусы леніі номер 23, 23А і 25 не будут од 1. марця іздити до Хоцянова. Писмо з выповіджыньом вплынуло в минулу пянтицю до польковицкого ратуша, хоц перед двома місяцями тоты самы власти Хоцянова підписали порозумліня о спілпрацы на цілый 2025 рік. Порушене Хоцяновом порозумліня зобовязувало ґміну Польковиці заґарантувати фінансуваня на тот транспорт в 2025 році 367 тис. зл – а ґміна Хоцянів мала дати 196 тис. зл. По здобытю додаткового фінансуваня з Фундушу Розвитку Автобусовых Перевозів, обі страны мали остаточно доложыти: Польковиці 287 тис. зл, а Хоцянів 153 тис. зл. Ґміна Польковиці заповіла актуализацию сіткы получын ґмінной публичной комунікациі кориґуючы леніі 23, 23А і 25. Новы розвязаня мают быти готовы до кінця того місяця.