Сумар дня на 5. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 5. лютого/фебруара 2021 р.

Комунікат Нацийонального Інституту Культуры і Спадковины Села

Нацийональный Інститут Культуры і Спадковины Села выдал пресовый комунікат про культурны і етнічны меншыны. На тот рік Інститут заплянувал цикль, в котрым хоче приближыти чытачам даны культурны ґрупы і етнічны меншыны, якы прожывают в Польщы і збогачают державну культуру. Інститут просит о контакт вшыткых представників культурных ґруп, етнічных меншын і жытелів одзначаючых ся культурово реґіонів, якы хотіли бы оповісти о своій культурі, традициях, жытю серед векшыны.

Перенята дворця в Загірю

В першій половині січня/януара бургомайстер міста і ґміны Загіря Ернест Новак звернул ся до Маршалківского Уряду Підкарпатского Воєвідства о поміч в перенятю будинку желізничной стациі в Загірю і отримал попертя Самоуряду. Віцемаршалок Підкарпатского Воєвідства Пьотр Пільх звернул ся до ПКП С.А. в Кракові, до котрого актуально належыт будинок, о можливо пріоритетове процедуваня і принятя одповідніх мір, рекомендуваных Ґміном Загіря. В писмі зазначыл, што фунґуваня дворця єст важне м.ін. з огляду на пляны ревітализациі желізничных леній 108 Стружы-Коростенко на одтинках Ясло-Нове Загіря та Нове Загіря-Лупків. Важным фактором являт ся недавно урухомлена реляция Краків-Загіря. Буде то тіж наступный крок ґу поліпшыню комунікацийного доступу Бєщадів і полудньово-східньой части Польщы.

Анімация Бічского Ярмаку Культуры

На каналі Бічского Пункту Туристичной Інформациі в сервісі Ютюб явила ся анімация Бічского Ярмаку Культуры, якого будова має ся зачати в квітни/апріли тр. Проєкт пн. «Будова Бічского Ярмаку Культуры» отримал 2 787 000 злотых дофінансуваня з Реґіонального Операцийного Проґраму. Актуально тырват конкурс оферт на реализацию задачы. Комплекс буде ся складал з головного будинку презначеного на культурну діяльніст Бічского Центру Культуры, великой сцены, де будут орґанізуваны культурны подіі, як тіж огріваных выставово-гандльовых павілонів, одділеных закрытым пасажом долгости ок. 60 м. Плянуваный термін завершыня робіт то початок 2023 рока.

Перебудова мосту над Санківком

Ґміна Санкова подає, што іщы в тым році зачнут ся роботы на воєвідскій дорозі 977, звязаны з перебудовом мосту над ріком Санківком при мотузковым парку в Сярах. Заряд Воєвідскых Доріг актуально рыхтує ся до конкурсу оферт на будівляны роботы. Кєд вшытко ся поведе згідно з пляном, то єст шанса, же роботы будут завершены іщы в тым році. Перебудова мосту на граници Санковой і Сяр в значучый спосіб зліпшыт комунікацию на воєвідскій дорозі 977.

Електричный автобус в Бобовій

Ґміна Бобова, як першый самоуряд в ґорлицкым повіті, буде од тепер хоснувала електричный автобус. В Бобовій побудувано в тій ціли специяльно стацию. Автобус єст пристосуваный перевозити неполносправны особы і мат окреме становиско на дітячый, або інвалідскій візок. Кошт автобусу і будовы стациі то близко 2 мілийоны злотых. 90% коштів покрыло дофінансуваня з Нацийонального Фонду Охороны Середовиска і Водной Економікы в Варшаві. Автобус має быти туньшый в експлоатациі, тихшый і барже еколоґічный.