Сумар дня на 4. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 4. жолтня/октобра 2024 р.

Змодернізуют желізничну ленію Ґорлиці Заґужаны – Ґорлиці. Побудувана буде лучниця.

Будут новы можливости подорожы желізницьом з центра Ґорлиц. Як інформували Польскы Желізничны Леніі PKP, завдякы черговым плянуваным інвестициям в рамкак Державного Желізничного Пляну, жытелі Малопольщы зыскают ліпшу доступніст до желізниці і справнійшы получыня потягом. Спілка підписала догваріня на опрацуваня проєктовой документациі, обнимаючой ревітализацию леніі нр 110 Ґорлиці Заґужаны – Ґорлиці, як і будову лучниці долгости близко 700 метрів медже леніями 110 Ґорлиці Заґужаны – Ґорлиці і ленійом нр 108 Сторожы – Коростенко. Єдночасно обнимат і ревітализацию леніі нр 110, в тым м.ін. перебудову стациі Ґорлиці і Ґорлиці Заґужаны та пристанку Ґорлиці Ґлінік. Кошт задачы то близко 5 млн злотых. Цілю плянуваной будовы лучниці єст уможливіня руху потягів з центра Ґорлиц безпосередньо в сторону Сторожів, Тарнова і Кракова, без конечности візду на стацию Ґорлиці Заґужаны для зміны напряму ізды. Лучниця злегшыт рух і скоротит час подорожы. Додатково ревітализация леніі разом з перебудовом перонів має ся причынити до звекшыня атракцийности получынь і зліпшыня комунікацийной доступности жытелів. Реализация проєктовых прац єст передвиджена на рокы 2024-2028.

Одбыл ся 68. Конґрес FUEN

В днях 19.-22. вересня/септембра тр. в Гусум в Німцьох проходил 68 Конґрес Федеральной Уніі Европейскых Меншын (FUEN). Взяло в ним участ близко 180 представників автохтонных нацийональных меншын і языковых ґруп з около 30 держав. Цілю конґресу было поділити ся досвідом і вымінити погляды про актуальну ситуацию меншыновых соспільности в Европі. Тогорічный конґрес был і нагодом до святкуваня 75. річниці основаня FUEN. Тота медженародна позаурядова орґанізация была одкрыта в 1949 р. в звязку з основаньом Рады Европы. Одограла ключову ролю в заохочыню Рады Европы приняти Европейску карту реґіональных або меншыновых языків та Рамову конвенцию о охороні нацийональных меншын. На тогорічній конференциі была м.ін порушена тема неповоджыня ініциятивы Minority Safepack, котра мимо зобраня понад мілийона підписів од громадян держав Европейской Уніі не была принята Европейском Комісийом. Припомнийме, што цілю проєкту было приняти Евросоюзом політичны розвязаня, што хоронят права меншын в ріжных аспектах. Дискутувано і о меншых, короткодистансовых цілях меншын, як і проблемах з захованьом языка і едукацийом.

Квятоньска церков буде мала професийональный протиогньовый систем

В Квятони зачали ся працы при чыщыню деревяных стін церкви. Лемківска грекокатолицка церков св. Параскєвы в Квятони належыт до найліпше захованых лемківскых церкви в Польщы, находит ся на Списку Світовой Спадковины UNESCO і на шляку деревяной архітектуры малопольского воєвідства. Была побудувана в другій половині XVII столітя. Актуально єст хоснувана як помічный римокатолицкій костел. В рамках інвестициі церков буде ззовни вычыщена, вымінены будут м.ін. знищены елементы кріквяной системы, а ґонт і кресты на вежах будут підданы консервациі. Окрем того церков в Квятони буде одтепер хоронена професийональным протиогньовым системом FOG. Інвестиция єст реализуваня завдякы дотациі з Урядового Проґраму Одбудовы Забытків. Працы мают потырвати близко три тыжні.