Сумар дня на 4. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 4. жолтня/октобра 2021 р.

Комунікат ведучых лемківскых орґанізаций в справі Нацийонального Повселюдного Списуваня 2021

З нагоды завершыня в четвер, 30. вересня/септембра, Нацийонального Повселюдного Списуваня Жытелів і Мешкань 2021 ведуча Стоваришыня «Руска Бурса» в Ґорлицях – Наталия Малецка-Новак, та ведучый Стоваришыня Лемків – Андрий Копча, выдали в тій справі комунікат. Ціле писмо мож чытати м.ін. на нашым інтернетовым сайті lem.fm. Ведучы дякуют в ним вшыткым думаючым при списуваню на тото, што лемківска нацийональніст є частю іх ідентичности і дополнює ріжнорідніст Польщы. Вірят, же до лемківской нацийональности приголосило ся векше чысло осіб як в остатнім списуваню, завдякы позитивній енерґіі і роботі вельох підметів в послідній декаді. В комунікаті підсумовуют діяня при загальнорусиньскій кампаніі Сме Русины / Сме Лемкы, яка мала заохочати, припоминати і усвідомлювати і Русинам в Польщы потребу голосити ся до свойой нацийональности і материньского языка. Ведучы підкрислили історичный успіх, якым было прилучыня ся до кампаніі Русинів жыючых в ріжных европейскых державах. Реализация реченой кампаніі уж тепер має позитивный ефект, кєд же принесла знаня о долгодобовых і вымірных результатах спілпрацы. Припомнийме, же першы результаты списуваня будут опубликуваны в січни/януарі 2022 рока.

Вертат желізницьове получыня Ясло-Біч-Краків

Вертат желізницьове вікендове получыня на трасі Ясло-Біч-Краків. Курс єст реализуваный Малопольскыма Желізницями. Потяг буде ішол в пятниці з Кракова до Ясла і в неділі з Ясла до Кракова. Получыня мало свою інавґурацию в минулу пятницю, 1. жолтня/октобра. Курс є створеный предовышткым з думком о особах, якы студиюют на краківскых учельнях, зато потяг буде одходил в пізных пополудньовых годинах. Получыньом хотят заінтересувати і вікендовых туристів. Потяг затримує ся на стациях: Ясло, Біч, Ґорлиці Загіряны, Тарнів і Краків Головный.

В Ґорлицях буде діяла Рада Безпекы Дорогового Руху

В Ґорлицях покликали Раду Безпекы Дорогового Руху, новый дорадчый орґан Бургомайстра Міста Ґорлиці. Перша його стріча прошла в минулый понедільок, 27. вересня/септембра. Цілю Рады єст ініциювати, консультувати і координувати оптимальны соспільны діяня ведучы до запевніня поправы безпекы дорогового руху на обшыри Ґорлиц. Єдном з задач Рады буде тіж шыріня знаня о безпеці серед діти і шкільной молодежы. Має она діяти во спілпрацы з Воєвідском і Повітовом Радом Безпекы Дорогового Руху. Рада была покликана на внесок Віцемаршалка Малопольского Воєвідства Лукаша Смулкы в обшыри покликаня рад безпекы дорогового руху в Малопольщы.

Модернізацию креницкого дворця будут консультувати з жытелями

Старый желізницьовый дворец в Креници має быти неодолга зміненый в модерный мультіфункцийональный простір. В звязку з реченыма плянами в середу, 6. жолтня/октобра, одбуде ся консультацийна стріча для жытелів Крениці, вчас котрой будут они мати нагоду повісти про своі потребы. Новый простір може полнити м.ін. функцию бізнес-інкубатора, коворкінґового простору ци простору до орґанізациі курсів і школінь.