Сумар дня на 4. січня/януара 2022 р.

Приносиме вам сумар медияльной ґрупы ЛЕМ.фм+ на ден 4. січня/януара 2022 р.

«Етнопольща»- новый набір внесків до проґраму 

Нацийональный Центр Культуры оголосил набір внесків до проґраму «Етнопольща» едиция 2022. В його рамках мож отримати дофінансуваня на реализацию задач, котры допоможут в підтримуваню культуровой достоменности ци дозволят на участ в культурі на локальным та реґіональным рівни. Підниманы ініциятивы можут безпосередньо навязувати до традициі або вказати ю в модерній спосіб. Проґрам підтримує тіж такы задачы, цілю котрых єст дополніня або реновация народных кроів ци обрядовых реквізитів для реґіональных ансамблів, презентуючых ся в традицийных танцях, співах і музиці. Зато же проґрам направленый єст на зрівноваженый розвиток, то особливо одповідат на меншы можливости участи в культуровым жытю жытелів меншых міст або сел. З той причыны задачы реализуваны в місцях рахуючых менше як 50 тис. мешканців будут мати більшы шансы отримати дофінансуваня. Тогорічный буджет проєкту то аж 10 млн зл. Набір внесків тырвал буде до 17. січня/януара тр.

Церков св. Миколая в Поляні потрібує як найскорше ремонту

Храм св. Миколая в Поляні (бєщадскій повіт) то найправдоподібнійше найстаршый сакральный обєкт на обшыри Бєщадів, котрый перетырвал до днес. Як церков хоснуваный был од 1790 рока, од 1969 хоснуваный єст римокатолицкым костелом. Приналежыт парохіі покровы Переображыня Господнього в Поляні, котра попросила зробити технічну опінію. Результаты досліджыня вказали, што стан церкви ся погіршат, особливо ззовни. Головны того причыны то знищеный дах та осіданя фундаментів од пілнічной страны. Тото зас спричынят нищыня захованой в середині церкви поліхроміі з початку XX віку. Додатково на основі вступных одкрывок полудньовой і західньой страну навы, вышло, же під верством фарбы заховали ся дальшы фраґменты розписи. Парохія буде ся старала отримати дофінансуваня на ґрунтовный ремонт, котрый зачне ся выміном даху. Церков влучена єст до підкарпатского Шляку Деревяной Архітектуры.

«Вікенд з Нижньошлезском Желізницьом»

Нижньошлезска желізниця зрыхтувала на долгій вікенд промоцию «Вікенд з Нижньошлезском Желізницьом». Спецяльны білеты будут важны уж од вечера 5. січня/януара аж до понедількя 10. січня/януара. Білеты дают можливіст нелімітуваных переіздів вшыткыма потягами перевозника цілый долгій вікенд. Цілю акциі єст заохотити жытелів реґіону до подорожы по Нижнім Шлеску та корыстати з зимовой хвилі. Потягами мож буде ся достати в Карконошы ци на лыжны стациі в Якушыцях ци Шреници.

Остатні два разы мож видіти пєсу «Вертеп» 

На конец припоминаме, же іщы в тот вікенд – 8. і 9. січня/януара, мож видіти пєсу пн. «Вертеп» зрыхтувану меджепоколіньовом театральном ґрупом Племя з Устя Руского. Пєса в режысериі Мариюша Лясковского і на основі сценария Монікы Бабулі єст нетипова і з многыма одкликанями до Низкого Бескіду. Не бракне музикы ци коляд в аранжациі Мирослава Боґоня. Остатні спектаклі пройдут в церкви св. Параскєвы в Устю Рускым в суботу і неділю о 18.00 год.