Сумар дня на 4. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 4. серпня/авґуста 2023 р.

Днес розгорит оген михалівской Ватры

Уж днес зачынат ся 43. Лемківска Ватра на Чужыні в Михалові, яку орґанізує Стоваришыня Лемків. Красні вшыткых просиме на офіцияльный початок, якій зачне ся о 19.00 год. Пак по выступі ЛАПіТ «Ластівочка» о 20.00 год. одбуде ся святочне положыня огня. Ватру розпалит двох найстаршых лемківскых жытелів Михалова (уродженці Фльоринкы) – 90-літній Ярослав Шляхтич і 85-літній Михал Канючок. Символичный оген з Лемковины принесут проф. Олена Дуць-Файфер і члены ансамблю Зоря з Устя Руского. В пятницю одбуде ся положыня квітя під памятником жертв Акциі «Вісла» і переданя Нагороды ім. Никыфора. Детальный проґрам найдете на сайті орґанізатора. На Лемківскій Ватрі на Чужыні будеме і мы – радийо ЛЕМ.фм і Стоваришыня «Руска Бурса» в Ґорлицях. Просиме до нашого шатра, де будеме продавати книжкы, цедечка і ґаждеты звязаны з нашом культуром.

Буковскій подякувал русиньскым селам

Полномічный влады Словацкой Республикы про нацийональны меншыны Ласло Буковскій в повязаню з недавно приятом через власти «Справом о стані хоснуваня языків нацийональных меншын» загнал подякувальне писмо пріматорам і старостам тых сел і міст, котры на основі даных з анкєты в максимальных можливостях дотримуют меншыновы языковы права. Звіданя з реченой анкєты односили ся до дотримуваня меншынового языкового закону. Серед тых місцевости, котрым Буковскій загнал подякуваня, сут мадярскы і русиньскы міста і села. Полномічный окрем інчого высловлює пересвідчыня, што позитивный приступ самосправ помагат будувати одкрыту і толеранцийну соспільніст, а так само выразно зліпшат рівен аплікациі языковых прав членів меншын на містецкым рівни, як і на цілій териториі Словациі.

Лемківска меншына без додатковых дотаций

Міністерство Внутрішніх Справ і Адміністрациі оголосило результаты тзв. одкрытого конкурсу оферт на реализацию в 2023 р. публичной задачы з обшыри діянь для нацийональных і етнічных меншын та реґіонального языка пн. «Пропаґуваня знаня о нацийональных і етнічных меншынах або реґіональным языку». Серед стараючых ся о дотацию на даякых діяня были і лемківскы орґанізациі, але нияка з них не отримала дофінансуваня. O грошы старали ся Стоваришыня «Руска Бурса» в Ґорлицях і Музей Лемківской Культуры в Зындрановій. Міністерство не достерегло потребы дофінансуваня задач тых орґанізаций. Полный список внескодавців і орґанізаций, котры отримали дотацию, найдете на міністерияльным сайті.