Сумар дня на 4. марця 2021 р.

Приносиме вам сумар медияльной ґрупы ЛЕМ.фм+ на ден 4. марця 2021 р.

Нова «Бесіда» уж в вашых руках

В тых днях вышло нове чысло часопису Стоваришыня Лемків «Бесіда», ч. 1 (178) за місяці січен/лютый 2021 р. Ноне выданя єст в великій мірі принагідне, кєд часопис припоминат про ближучый ся нацийональный повселюдный спис, жебы Лемкы гордо деклярували свою достоменніст і рідный язык. Окрем того в найновшій «Бесіді» прочытаме м.ін. статю Северияна Косовского про реляцию з Дня Русинів в Польщы, якій орґанізувало Стоваришыня «Руска Бурса» в Ґорлицях, а якого головном темом была презентация книжкы з лемківском публицистиком пн. «Перша ліґа парібків». Явил ся тіж допис про премєрове выконаня ансамбльом Терочка гымну Лемків – «На Лемковині». Наталия Малецка-Новак написала про результаты плястичного конкурсу про наймолодшых, якій так само орґанізувала ґорлицка Бурса. Дальше явил ся допис од Дюры Папуґы зо Сербіі, якій возник при нагоді 30. річниці основаня русиньской орґанізациі в Сербіі – «Руской Маткы». Дальше сут споминовы статі на Юрия Кальман Жатковича, священника, історика, етноґрафа і перекладача з Підкарпатской Руси, 100. річниця смерти якого минула в вересни/септембрі минулого рока. Споминат ся тіж на 30. річницю смерти Івана Горощака, лемківского поеты, різбяря, по роді з Білцаревы. Нашло ся і продолжыня творчости і передумань Петра Кырпана, переселенця з Тылявы, якій жыл по 1945 р. на Украіні. В части Одышли од нас споминат ся на бывшых членів ансамблю Лемковина, покійных Ваня Поручника та Владиміря Гнатишака.

Конференция Европа Карпат

27. і 28. лютого/фебруара одбыл ся за порядком 28. річник медженародной конференциі Европа Карпат, котрой орґанізатором є Сойм Польской Республикы. З причыны пандеміі конференция проходила онляйн. На ній своіх представників мал і Пряшівскій Самосправный Край (ПСК). Участ брал тіж председа краю Мілян Маєрскій. Жупан выступил з приговором з підпорным становиском про Макрореґіональну стратеґію про Карпаты. Конференция одбыла ся коротко по 30. річници выникнутя Вышеградской Ґрупы (V4). Головныма темами были: будучніст центральной Европы в зміняючых ся ґеополітичных обставинах, інфраструктура в рамках Ініциятивы Триморя, розвиток приграничных реґіонів та культура карпатскых краін і молодежы жыючой в реґіоні. Карпатска стратеґія хоче звекшыти атрацийніст реґіону і зліпшыти обставины і якіст жытя мешканців той териториі.

Оборона докторской дисертациі о. Ігоря Габуры

23. лютого/фебруара на Християньскій Богословскій Академіі в Варшаві одбыла ся публична оборона докторской дисертациі православного священника, о. Ігоря Габуры, якій служыт во Вроcлаві і як парох в невеликій лемківскій парохіі на чужыні, в Самбожу на Нижнім Шлеску. О. Габура боронил працы пн. «Біблийны основы православной теолоґіі Господнього Імена» (Biblijne podstawy prawosławnej teologii Imienia Bożego). Промотором докторской працы был владыка вроцлавско-щеціньскій, Архієпископ Юрий. Найперше владыка представил особу докторонта, пак о. Габура перешол до автореферату. О. Ігор Габура отримал званя доктора богословскых наух Християньской Богословской Академіі. Священник вродил ся в 1990 р. в Зеленій Горі, в лемківскій родині православного священника o. Aнтония Габуры, якого рід выходит зо села Фльоринка. В 2014 р. з был рукополеженый товдышнім владыком вроцлавско-щеціньскым Єремійом на діакона, пак на свщенника.

Знаме дату тогорічного Русиньского Фестівалю во Свиднику

Xoц пандемія не одпущат, то орґанізаторы бодай найбільшой русиньской пленеровой імпрезы во світі – Русиньского Фестівалю во Свиднику, оголосили уж дату тогорічной едициі подіі. ІХ Русиньскій Фестіваль во Свиднику одбуде ся в днях 24.-30. мая 2021 р. Єст то найбільша наша імпреза, яка тырват такой тыжден. Все в середині тыжня проходят товаришучы акциі, як презентациі книжок, выставы ци театральны пєсы. В вікенд фестівалю одбыват ся центральна його част, яка проходит во свидницкым амфітеатрі, де выступуют русиньскы домашні і заграничны солисты і ансамблі. Фестіваль дотля каждого рока притігал по пару тисячів участників. Надійме, што тогорічна едиция буде могла одбыти ся уж без векшых компликаций і ограничынь. Про деталі і можливіст придбати вступне в передплаті будеме інформувати, кєд лем являт ся такы інформациі.