Сумар дня на 4. марця 2020 р.

Приносиме вам сумар медияльной ґрупы ЛЕМ.фм+ на ден 4. марця 2020 р.

Выедукуют новых пчолярів

Кружок Пчолярів в Санковій, ґміна Санкова та позаурядова орґанізация зо Словациі «Ондава на ціле жытя» реалізуют разом трансграничный проєкт, цілю котрого єст промувати пчолярску професию. В рамках задачы од марця до мая ведены будут в Нижній Полянці на Словациі специялистичны школіня з обшыри триманя пчіл. Дополніньом теоретичных занять будут прогулькы і практичны варштаты на тему ведіня пасікы. Варштаты пройдут м.ін. в Бортным, де активным і професийным пчолярьом єст о. Мирослав Цідило. Головном цілю проєкту єст едукувати новых пчолярів і вказати, як хоснувати природничый і рільничый засіб приграничной обшыри Словациі, жебы ограничыти еміґруваня люди зо сел до міст.

50 лавочок на 50 років СКБП

Студентскій Кружок Бескідскых Провідників в Ряшові хоче в нетиповый спосіб одсвяткувати припадаюче в тым році 50-літя свойой діяльности. Любителі пішых вандрівок плянуют зрыхтувати (своіма руками) 50 простых лавок і уставити іх в видоковых місцях в Низкым Бескіді, на Погірю і в Бєщадах. Лавочкы поміщены будут головні при туристичных путях. Роботы рушают в найблизшу суботу. Лавкы з лоґо 50-літя СКБП Ряшів мают быти готовы іщы в марци, а монтуваны будут на яр і літом. Кружок веде тіж вступны бесіды з Державныма Лісами про згоду на поставліня лавок в місцях, котры выбрали провідникы.

Вельо русиньскых книжок на торгах в Новым Саді

Од 3. до 9. марця в Новым Саді в Сербіі проходят Медженародны Торгы Книжкы. В пятницю, 6. марця, презентувати будут русиньскы публикациі, од 13.00 год. своі выдавництва вказувала буде Новинарско-выдавнича Oрґанізация «Рускє Слово», а од 14.00 год. Інституция за Культуру Русинів. На промоцийных стрічах вказуваны будут книжкы печатаны в минулым році, м.ін. другій том «Руснаків» авторства Дюры Латяка, збірник поезиі Славка Романа Рондо «Одняти од псох» ци книжкы з поезийом, піснями, приповідками для діти, прим. «За главкы у лавкы» Ірины Гарди Ковачевич та «Босы по праху» Сильвестра Макая. На промоциі присутны будут авторы книжок і рецензенты – буде то нагода, жебы побесідувати о выданых уж книжках, але і о перспективах розвитку літературы по русиньскы.

Загорода просит презентувати своі выробы на Лемківско-Погіряньскым Великодным Ярмаку

Мазярска Загорода в Лоси (одділіня Музею Дворы Карвациянів і Ґладышів в Ґорлицях) дальшый рік орґанізує святочный Лемківско-Погіряньскій Великодній Ярмак і хоц до подіі іщы більше як три тыжні, то інформацию подаєме уж днес – орґанізаторы сердечні просят вшыткых народных творців і ремісників зголошувати ся до участи в ярмаку і презентациі своіх выробів. Ярмак одбуде ся 29. марця в Мазярскій Загороді в Лоси. Зголошыня під но 601 411 590 або на адрес: zagroda.maziarska@gmail.com.