Сумар дня на 4. липця/юлия 2023 р.

Приносиме вам сумар медияльной ґрупы ЛЕМ.фм+ на ден 4. липця/юлия 2023 р.

В Ольштыні бесідували про нацийональны і етнічны меншыны

В минулым тыжни, 27. і 28. червця/юнія в Варміньско-Мазурскым Воєвідскым Уряді в Ольштыні прошла стріча представників Міністерства Внутрнішніх Справ і Адміністрациі з особами, котры одповідальны сут за справы нацийональных і етнічных меншын та соспільности хоснуючой реґіональный язык в поєдных воєвідствах. Дискусия вчас дводньовой стрічы зосереджала ся головні на квестиях звязаных зо спілпрацом полномічных воєводів з орґанізациями нацийональных і етнічных меншын і тыма, што для них діют. Зобраны выслухали выкладу про правны аспекты медженародных стандардів охороны прав меншын та взяли участ в панели тыкаючым систем меншыновой освіты і реализациі Проґраму соспільной і громадяньской інтеґрациі Ромів в Польщы на рокы 2021-2030. Участникы познали і принципы хоснуваня електронной системы признаваня дотаций, котра од 2024 р. буде хоснувана до складаня внесків на реализацию задач. Презенатция новой системы была нагодом до підсумуваня дотаций на квоту веце як 18 млн зл признаных на 2023 р., найвекшыма бенефіциєнтами якых сут орґанізациі меншын: німецкой, украіньской, лемківской і кашебской соспільности. Віцешеф МВСіА подал, што влони повело ся рекордово звекшыти середкы на цільовы і підметовы дотациі, што подля него вказує, же тота част буджету державы єст достерігана урядом.

Фінансова підпора з проґраму Interreg Польща-Словация для Пряшівского Самосправного Краю

Одділіня комунікациі Пряшівского Самосправного Краю поінформувало, што отримал він близко 3,9 млн евро до схоснуваня на приграничны проєкты і додатковых 600 тис. евро на модернізацию дорогы з Лысой Поляны – вшытко в рамках дофінансуваня з проґраму Interreg Польща-Словация 2021-2027. Цілю трансграничного проґраму єст фінансова підпора проєктів тыкаючых промуваня інституцийональных спілпрац і модернізациі доріг. Отримане дофінансуваня буде презначене на реализацию тзв. малых проєктів під гослом «Вєдно в приграничу». Цілю той части проєкту єст інтеґрация жытелів приграничных місцевости та поправа іх якости жытя м.ін. через реализацию задач з обшыри освіты, еколоґіі, культуры, спорту, розвитку туристикы ци господарскых спілпрац. В рамках проєкту ПСК зрыхтує школіня і консультацийны стрічы для потенцияльных жадателів малых проєктів, котры першы внескы быти може будут мочы зложыти уж того рока на осін. Дофінансуваня з проґраму Interreg уможливит тіж реконструкцию дорогы на трасі до граничного переходу в Лысій Поляні, так по польскій, як і словацкій страні. Доцільово модернізуваный буде понад 4-кілометровый одтинок, з чого 1,5 км по словацкій страні.

«Русиньскы співанкы»

В першу неділю липця/юлия в сельскым клюбі в Нижній Грабовници прошла презентация книжкы «Русиньскы співанкы», котру позберала і упорядкувала Ольга Прокоп. Публикация рахує понад 500 стран і вышла в выдавництві «Карпати». Ольга Прокоп зберала русиньскы співанкы ціле своє жытя. В 2020 р., іщы за жытя авторкы, завдякы Русинам з Мадяр вышла част співанок під такым самым наголовком «Русиньскы співанкы» – зо співанками для діти, до колысаня і коломыйками. На презентациі публикациі в Нижній Грабовници не бракло і артистичной части, на сцені вказали ся фольклорны ансамблі: Бабчина Співаночка – основана Ольгом Прокоп, і ансамбль Чинадіївка, котрого Прокоп была членкыньом, запрезентувала ся тіж Олена Никытюк, з котром Прокоп співала в дуеті Червена Ружа.