Сумар дня на 4. грудня/децембра 2024 р.

Приносиме вам сумар медияльной ґрупы ЛЕМ.фм+ на ден 4. грудня/децембра 2024 р.

Антоний Крог з міністерияльном нагородом

Антоний Крог, етноґраф, писменник, бадач і куратор выстав присвяченых народній культурі Карпат остал єдным з лавреатів нагороды Міністра Культуры і Нацийональной Спадковины за діяльніст, котра в особливый спосіб причынила ся до розвитку, популяризациі і охороны нацийональной спадковины. Ґаля вручыня нагорід одбыла ся в Кракові 27. листопада/новембра, выріжніня особисто передавала Міністра Ганна Врублевска. Антоний Крог остал лавреатом нагороды в катеґориі Народна Культура. Одзначеный етноґраф был єдным з першых бадачів, якій по ІІ світовій войні вюл на Лемковині тереновы баданя, заінтересуваня Лемковином принесли велику выставу пн. «Лемкы» зорґанізувану в 1984 році, іщы перед системовыма змінами, што вымагало великой одвагы. Антоний Крог єст тіж автором книжкы «За тамтом гором», котра бесідує о Лемках – о выселінях, о жытю в часах PRL і о одраджаню ся лемківского жытя. Крог через рокы свойой діяльности орґанізувал тіж карпатскы конкурсы народной штукы та «од років вносит цінный вклад в документуваня, інерпретуваня і популяризацию народной культуры», подано в лявдациі.

«Переселили нас мусово. Листы лемків з років 1947-48» – промоция книжкы

В найблизшый понедільок 9. грудня/децембра во Вроцлаві одбуде ся стріча промуюча публикацию «Переселили нас мусово. Листы лемків з років 1947-48» під редакцийом Юрия Стариньского. Публикация печатана єст в двох томах, выдало єй Стоваришыня Лемківскій Ансамбль Пісні і Танця «Кычера». Стрічу вюл буде проф. др габ. Ростислав Жерелік, присутны на бесіді о книжці будут м.ін. проф. др габ. Григорий Грицюк, др габ. Павел Коробчак і др габ. Малґожата Місяк. Пибликация єст незвыклі цінным выдавництвом – то выбір автентичных листів Лемків, в котрых описуют они драматичны подіі звязаны з выганяньом. Становлят свідоцтво выселінь і кривд, якых дознали. По бесіді о книжці одбуде ся концерт ґрупы H’лем folk. Подія пройде в Рефектажы Нацийонального Закладу ім. Оссоліньскых во Вроцлаві, початок о 17.00 год.

Русиньскій передставник меншыны в румуньскым парляменті

В неділю 1. грудня/децембра в Румуніі проходили парляментарны выборы. Громаяне выберали представників Сенату і Сойму. Окрем 31 політичных партий і коаліций, в выборах брало участ і 19 орґанізаций за нацийональны меншыны, якы жыют в Руминіі, сут офіцийно вызнаны і можут мати представительство в парляменті. Аж 18 нацийональных орґанізаций могло здобыти од єдного до семох мандатів. За русиньску меншыну кандидата подало Культурне Товариство Русинів Румуніі, котре є і членом Світового Конґресу Русинів. Кандидатом был м.ін. Юлийюс Мариян Фірцак, котрый был русиньскым депутатом і в двох попередніх періодах. І тепер повело му ся остати послом. В попередніх періодах діяня в парляменті был м.ін. секретарьом Парляментарной Ґрупы про Нацийональны і Етнічны Меншыны. Подля офіцийных даных зо списуваня в Румуніі жыє 834 Русинів. В будучым році в столици державы буде проходило засіданя Світового Конґресу Русинів, котрого головным орґанізатором буде як раз Культурне Товариство Русинів Румуніі.

Днес Свято Копальників!

Днес найважнійше свято для копальників – тзв. Барбурка. В календари є то 4. грудня/децембра, коли приводит ся памят о Святій Варварі, покровительці копальників. З той нагоды і в інтенциі вшыткых копальныків правлене было о год. 8.30 богослужыня в православній парохіі св. Тройці в Любіні, котре одслужыл Капелян Копальництва о. прот. Богдан Репела. На Нижнім Шлеску в ґлоґівско-любіньско-ліґницкым округу выдобывают руды міди. Лемкы то значуча і чысленно велика ґрупа в тым реґіоні, яка підняла ся робити в Гірничо-Гутничій Копальни Міди в Любіні. Згідно з юлияньскым календарьом, празднуют церковне свято Введіня во Храм Пресвятой Богородиці і то до Ней, Божой Матери, напрявляют своі молитвы о покровительство над вшыткыма копальниками і іх родинами. З нагоды днешнього свята желаме вшыткого найліпшого для вшыткых копальників і гутників, дуже здоровля і того, жебы выіхати горі тілько раз, што зъіхати долов.

Фот. Любін 2020 рік, архів лем.фм