Сумар дня на 4. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 4. грудня/децембра 2023 р.

Ден Русинів Польщы 2023

В суботу 2. грудня/децембра проходили центральны святкуваня нашого нацийонального свята – Дня Русинів Польщы. Каждого рока 5. грудня/децембра празднуєме наше нацийональне свято для упамятніня віче во Фльоринці, якє прошло в 1918 р. і дало початок Рускій Народній Республиці Лемків. Того рока одзначыли сме тото лемківскє свято 2. грудня/децембра. Ден зачал ся стрічом во Фльоринці, для упамятніня 105. річниці віче. Дальше стрітили сме ся в Рускій Бурсі в Ґорлицях. В проґрамі были доповід Міляна Яна Піліпа о русиньскій нацийональній символиці і выступ діючого при Рускій Бурсі ансамблю Терочка. Того тіж дня перед святкуванями в Рускій Бурсі стрітили ся редакторы з радия ЛЕМ.фм, жебы підсумувати працу в 2023 р. і омовити радийово-портальовы пляны на 2024.

Форум Европейскых Меншыновых Реґіонів

В днях од 1. до 3. грудня/децембра в Ополи і Катовицях проходила 7. едиция Форум Европейскых Меншыновых Реґіонів, яка орґанізувана была Федеральном Унійом Европейскых Меншын (FUEN) і Звязком Німецкых Стоваришынь в Польщы. Темом форуму были менышновы языкы на рынку працы. Участникы бесідували про можливости, якы дає знаня меншынового языка в приватным і публичным секторі, як і о вызванях для меншыновых орґанізаций глядаючых працівників хоснуючых меншыновый язык.

Стріча омбудсмана і СКУтНіЕМ

23. листопада/новембра польскій омбудсман Марцін Віонцек стрітил ся з членами Спільной Комісиі Уряду та Нацийональных і Етнічных Меншын. Темом стрічы были актуальны проблемы звязаны з ефективністю охороны прав нацийональных і етнічных меншын і соспільности хосуючой реґіональный язык в Польщы. Члены комісиі звернули увагу омбудсмана м.ін. на проблемы звязаны з фінансуваньом меншыновых орґанізаций і репрезентацийом меншын в соспільно-політичным жытю державы.

41. Головне засіданя Братства Православной Молодежы в Польщы

В суботу 2. грудня/децембра в Щеціні проходило 41. Головне засіданя Братства Православной Молодежы в Польщы. Взяло в ним участ понад 140 делеґатів, в тым репрезентациі парохіяльных братств, єпархіяльны заряды і іх духовы опікуны з цілой державы. Подія зачала ся архієрейском Літургійом в церкви св. Миколая в Щеціні, котру очелювал архієпископ вроцлавско-щеціньскій Юрий. Дальше молодіж перешла до щецінского уряду міста, де в сесийній сали проходило головне засіданя. На подіі в Щеціні присутна была і лемківска молодіж з Нижнього Шлеска, котра репрезентувала вроцлавско-щецінску єпархію. Братство взяло участ в засіданю в онлайновій формі. Было то перше в істориі головне засіданя Братства Православной Молодежы в тій части Польщы.

Вмер о. Ласло Пушкаш

Як інформувал сайт Мукачівской Грекокатолицкой Єпархіі, 24. листопада/новембра на 82. році жытя вмер о. Ласло Пушкаш. Священник был окрем інчого вызначным артистом, педаґоґом і працівником Комісиі про беатифікацию Александра Хіры, Петра Павла Ороса і ічных священномучеників Мукачівской Єпархіі. За свойу творчу, дослідничу і науково-літературну діяльніст был вельократно нагороджуваный, окрем інчого был лавреатом Преміі ім. Антония Годинкы. Допис про блаженной памяти о. Пушкаша прочытате на нашым портали.

Соспільный діалоґ на тему климату в Польковицях

В Польковицях завершыл ся проєкт пн. «Young dialogue and change maker – будуєме діалоґ вколо климатичных вызвань». Был він реализуваный од листопада/новембра минулого рока і обнимал м.ін. варштаты, стрічы, конкурсы і Польковицкій Климатичный Діалоґ. В проєкті взяло участ понад 200 осіб, головно молодіж. Проєкт мал на ціли змінціня громадяньскых постав серед жытелів ґміны, через соспільный діалоґ на тему природы і климату.