Сумар дня на 4. червця/юнія 2024 р.

Приносиме вам сумар медияльной ґрупы ЛЕМ.фм+ на ден 4. червця/юнія 2024 р.

Поломничество нацийональных і етнічных меншын на гору св. Анны

В неділю 2. червця/юнія представникы нацийональных і етнічных меншын в Польшы взяли участ в поломничестві на гору св. Анны. Літургію служыл опольскій єпископ Анджей Чая, а вірны молили ся по польскы, німецкы і ромскы. Поломничество меншын орґанізуване было уж 29 раз. Як передал ведучый Звязку Німецкых Соспільно-Культуральных Стоваришынь в Польщы, Рафал Бартек, поломничество єст постійным пунктом в функцийонуваню меншыны. Припомнул тіж о новых вызванях, якы чекают кажду меншыну. Лідер Шлезскых Самоурядів та бургомайстер Лесніцы, Лукаш Ястжембскій, підкрислил, што присутны молили ся о зрозуміня меншын і опіку. Додал тіж, што обовязком державы єст опіка над меншынами, котры збогачают соспільство і польску державу. В подіі, окрем представників меншын, брали тіж участ політикы. Поломничество зрыхтувал отец др габ. Пьотр Тарліньскій, вікарий опольского єпископа до справ нацийональных і етнічных меншын.

26 Стріча русиньскых шкіл

В суботу 1. червця/юнія прошла 26 стріча русиньскых шкіл. Того рока подія была орґанізуавана Основном школом Антуна Бауера в Вуковарі і Подручном школом в Петровцях, при спілпрацы з Дружством про русиньскій язык, літературу і культуру в Новым Саді та помочы Одділіня про освіту Нацийонального Совіту Русинів Сербіі. При нагоді в Петровцях святкывали тіж 110 років будинку школы. Участ в подіі взяли учытелі і учытелькы зо шкіл, де вчат русиньского языка, та представничкы спілпрацуючых орґанізаций – Ірина Папуґа і Олена Папуґа. Стріча зачала ся од привитаня присутных директором основной школы Антуна Бауера. В проґрамі стрічы нашло ся звиджаня грекокатолицкой церкви в Петровцях, Етноґрафічна выстава Русинів Хорвациі, презентация проґраму школярів та звиджаня грекокатолицкой церкви в Вуковарі.

Мож уж складати внескы в конкурсі «Вражлива Культура»

Заряд Малопольского Воєвідства просит позаурядовы орґанізациі складати оферты в конкурсі на реализацию задач звязаных з культуром пн. «Вражлива Культура». В рамках конкурсу промуваны будут предовшыткым проєкты, котрых цілю буде удоступняти культуру особам з неполносправностями, утырваляти і заховати культурову спадковину в цифровій формі та заохочати творити культуровы материялы. На реализацию задач заряд перезначыл 300 тис. зл, а максимальне дофінансуваня на проєкт выносит 25 тис. зл. Внескы мож складати до 20. червця/юнія тр.

Найблизшый вікенд в Низкым Бескіді пройде під гослом мизика

Товариство з Низкого Бескіду просит на суботу 8. червця/юнія до амфітеатру в Высовій на концерт ансамблю Верховина з нагоды 30. років іх діяльности. Концерт зачне ся о 19.00 год.. Вступне дармо, але в часі подіі ведена буде збірка на статутовы ціли Товариства з Низкого Бескіду. Того самого дня в Каштели в Шымбарку пройде артистично-едикацийне ґалицийскє інструментальне торговиско. Цілю подіі єст презентация і популяризация штукы творіня інструментів та спільне музикуваня, гуляня і співаня. Окрем презентациі творців інструментів в проґрамі нашли ся тіж варштаты, прелекциі і концерты. Торговиско орґанізуваня єст Фундацийом Творчых Ініцятив – Інструментальне Торговиско. Вступне дармо.