Сумар дня на 4. червця/юнія 2021 р.

Приносиме вам сумар медияльной ґрупы ЛЕМ.фм+ на ден 4. червця/юнія 2021 р.

Про участ меншын в реализациі Державного Пляну Одбудовы

На фейсбуковым профіли меншыновой страны Спільной Комісиі Уряду та Нацйональных і Етнічных Меншын явило ся становиско меншыновой страны Комісиі з 18. мая тр., підписане Спілведучым Комісиі Григорийом Купряновичом, в справі влучаня до Державного Пляну Одбудовы діянь тыкаючых нацийональных і етнічных меншын та соспільства, якє хоснує реґіональный язык. Як пишут, высока ступін загальности документу, якій был удоступненый шырокій публичній опініі, не дозвалят на ясну одповід, ци в часі його реализациі в поєдных компонентах середовиска нацийнальных і етнічных меншын та хоснувателі реґіонального языка будут мати можливіст брати участ на рівни з інчыма. Як підкрисляют, Польща єст державом, в якій процентова участ меншын, іх чысло і стосунково велика дисперсия, спричыняют, же іх потребы часто сут помияны. В писмі підкрислили м.ін вагу поєдных компонентів Державного Пляну Одбудовы для меншын, примірово Цифровой Трансформациі. Звернули увагу на проблем браку меншыновых інституций культуры, маючых постійне і системове фінансуваня з публичных фондів, што ограничат доступ до культуры етнічных і нацийональных меншын. Спомнули і на неґативне влияня пандеміі коронавіруса на фунґуваня меншын. Надіют ся, што потребы меншын будут взяты до увагы при реализациі Державного Пляну Одбудовы.

Пряшівскій Край веде в списуваню

Пряшівскій Край дале веде в асистуваным списуваню жытелів в рамках цілой Словацкой Республикы. 2. червця/юнія інформувала о тым говоркыня Списуваня Жытелів, Домів і Квартелів 2021 Ясміна Штаудер. Чысло списаных гын жытелів підняло ся на 90,8 процента, списало ся 68 466 осіб. Найскорше асистуване списуваня в Пряшівскым Краю іде в селі Ломнічка. Другым найліпшым селом є русиньска Цигелька. Села, котры мают найменше списаных, то Ленартів з 66 процентами, і русиньска Вышня Яблінка, де є затля списаных 68 процент люди. Як повіла Штаудер, на Словациі сут і села, котры мают іщы лем під 50 процент списаных жытелів. Сут то села з вылученыма социяльныма комунітами. Асистуване списуваня закінчыт ся на Словациі уж 13. червця/юнія того рока.

Православна молодіж попряче лемківскій цмонтір в Радоцині

Братство Православной Молодежы Перемышльско-Ґорлицкой Єпархіі просит вшыткых охочых до помочы в прятаню старого лемківского цмонтеря, якій ся находит в неістнуючым селі Радоцина. Акция єст заплянувана на заран, на 10.00 годину. Прятаючы цмонтір хотят оддати чест вмерлым предкам і поділити ся з нима пасхальном радістю, співаючы при гробах Христос Воскрес.

Одкрыли записы на грекокатолицкє поломництво на св. Гору Явір

Рушыли записы на грекокатолицкє поломництво на святу Гору Явір, якє пройде в тым році в днях од 12. до 16. липця/юлия. Поломникы підут з Крампной через Котан, Святкову Малу, Святкову Велику, Воловец, Незнайову, Чорне, Ясюнку, Криву, Ґладышів, Смерековец, Реґєтів, Шквіртне, Квятон і Ганчову. Посліднього дня поломництва на св. Горі Явір будут служены молебен до Пресвятой Богородиці і Понтифікальна Літургія. Записы будут одкрыты до 5. липця/юлия того рока.