Сумар дня на 31. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 31. жолтня/октобра 2022 р.

Перебудова воєвідской дорогы нр 977

Недолга рушыт перебудова воєвідской дорогы нр 977, яка лучыт Ґорлиці з Тарновом і границьом державы. В пятницю, 28. жолтня/октобра, війт ґміны Санкова Малґожата Малух підписала догваріня з фірмом Гажбуд в справі перебудовы дорогы нр 977 разом з будовом тротуару в Маластові. Кошт задачы то понад 626 тис. злотых. Окрем ходника побудуваны будут автобусовы зоны, перебудуваны істнуючы зъізды, а окрем того дорога і прилігаючый терен будут одводнены. Інвестиция буде спілфінансувана з середків Малопольского Воєвідства. Працы мают потырвати до початку липця/юлия 2023 рока.

Русиньскы выдавництва одпрезентуваны в Бельграді

До вчера в Бельграді проходил 65. річник Медженародных Торгів Книжок. Як інформувала аґентура Рутенпрес, на тій вызначній культурній подіі были в середу, 26. жолтня/октобра, одпрезентуваны і выданя войводиньскых Русинів. Своі актуальны публикациі і новости вказали представникы орґанізаций занимаючых ся выдаваньом пресы – Заводу про культуру войводиньскых Русинів і НВУ Рускє Слово. Участны были і дакотры авторы, якы бесідували о своіх книжках, інспірациях і мотивациях. Презентуваный был і репрінт першого чысла часопису «Шветлосц», з нагоды 70. річниці його основаня. Окрем того вказана была примірно збірка поезиі наймолодшой ґенерациі поетів з Войводины пн. «Ґенерация З@» ци новый правопис зо словником, котрый зрыхтували Михайло Фейса і Гелена Медєші. Представлены были і дальшы выданя, якы не могли быти презентуваны в попередніх роках з причыны пандемічных ограничынь.

Приповідкы Андерсена в Музею Русиньской Культуры в Пряшові

Здружыня молоды.Русины просит діти і дорослых до Словацкого Нацийонального Музею – Музею Русиньской Культуры в Пряшові на вернісаж обіздовой выставы ілюстраций Андерсеновых приповідок авторства Янка Курінця. Елементом вернісажу буде презентация переведеных до русиньского языка «Приповідок» Андерсена. В часі подіі буде мож слухати драматизуване чытаня професийныма акторами єдной з приповідок пн. «Дашто». В вернісажы возме участ і авторскій колектив, якій зрыхтувал публикацию. При нагоді буде можна видіти і другы музейны експозициі. Выставу мож буде обзерати в Музею Русиньской Культуры в Пряшові од 10. листопада/новембра до 10. грудня/децембра тр. Пак буде она перенесена до Любовняньской Книжници в Старій Любовни. Выстава была підтримана середками з Фонду на Підпору Культуры Нацийональных Меншын.

Сеньоры засадили ялиці в Радоцині

В середу, 19. жолтня/октобра, в Радоцині зышли ся студенты Універистету Золотого Віку в Ґорлицях. 65 студентів мало едукацийну прогульку до Школіньово-Выпочынкового Осередка Державных Лісів «Радоцина» в рамках проєкту LIFE-IP Екомалопольща «Дерево од Повіту, для добра климату». Вандрували они через Маластівску Маґуру, Ґладышів і Ждыню. На місци, в Радоцині, сеньоры засадили аж 150 дерев. Ялиці были нима посаджены в зрыхтуваных перше лісниками місцях.