Сумар дня на 31. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 31. серпня/авґуста 2021 р.

Якы інвестициі быти може ждут на жытелів ґорлицкого повіту в будучым році? 

Ґорлицкій Повіт оголосил, на якы інвестициі буде ся старал позыскати середкы в рамках Урядового Фонду Розвитку Доріг. Заряд повіту рішыл представити до дофінансуваня дві інвестициі, вартіст котрых вынесе понад 5 млн зл. Першом єст перебудова двох одтинків повітовой дорогы но. 1507К Шымбарк-Быстра-Шальова – єй кошторисова вартіст то понад 4 млн зл. Друга інвестиция то будова мосту над ріком Ропа на повітовій дорозі но. 1498 Ропа-Высова-Бліхнарка, што веде до границі державы.

«Карпатскій реґіон: етнолінґвістика і культуровы студиі» – новый напрям студий

На Ягайлоньскым Університеті в Інституті Реліґійознавства одкрыли новый напрям студий першой ступени – «Карпатскій реґіон: етнолінґвістика і культуровы студиі». До 12. вересня/септембра тырват другій етап рекрутациі, а лишыло ся іщы 21 місц. «Карпатскій реґіон: етнолінґвістика і культуровы студиі» то проґрам, што має інтердисциплинарный характер, лучыт він елементы языкознавства, культурознавства і реліґійознавства. Закладат трилітнє вчыня словацкого і украіньского языків і можливіст вчыня основ румуньского і лемківского. Студиі будут тыкати і проблематикы нацийональных, етнічных і реліґійных меншын. Проґрам як єдиный в Польщы має в оферті модулы посвячены лемківскій культурі.

Выставу знимок з Лемковины в Кракові

Новогуцкій Центр Культуры просит на фотоґрафічну выставу пн. «Лемковина» авторства Збіґнєва Подсядло. Выстава пройде в рамках подіі «Сила фотоґрафіі». Зачне ся в четвер, 2. вересня/септембра, і тырвала буде до 31. жолтня/октобра. Як повіл автор выставы, надіє ся, же фотоґрафіі дозволят зрозуміти історию Лемків, задумати ся над темом та почути климат Лемковины. Збіґнєв Подсядло то знаный фотоґраф, лавреат многых конкурсів. Його працы мож было обзерати на понад 200 выставах в державі і за єй границями. Нагородженый він єст м.ін. медальом 150-літя Фотоґрафіі ци одзначыньом Міністра Культуры і Нацийональной Спадковины «Заслуженый для Польской Культуры».

«ХыжоГраня» – подія на закінчыня літа в Кривій

В тоту суботу, 4. вересня/септембра, в Кривій пройде «ХыжоГраня» – подія на закінчыня літа. Подібні як в попередніх роках, на сцені запрезентуют ся артисты і ансамблі звязаны з лемківском музиком, поезийом, а аж і альтернатинвныма звуками. В проґрамі сут ґрупы Руты Увіты, Оркєстра Св. Миколая, ансамбль Сублокатор, выступит тіж Яцек Клейфф разом з Настком Някрасавом і Юзеф Сова. Стріча зачне ся о 15.00 год.

Зо Ждыні до Ґорлиц в часі пішого поломництва на праздник св. Максима Ґорлицкого

Братство Православной Молодежы Перемыльско-Ґорлицкой Єпархіі просит на четверте піше поломництво на праздник св. Максима Ґорлицкого. Поломництво з благословліня владыкы Паісия пройде 5. вересня/септембра. Зачне ся о 6.00 год. літургійом в церкви Покровы Пресвятой Богородиці в Ждыни, пак поломникы рушат до Ґорлиц. О 18.00 год. в катедральній церкви Святой Тройці в Ґорлицях зачне ся Всеночна. Записы на поломництво тырвают до 4. вересня/септембра. Охочы прошены сут контактувати ся з вызначеныма особами телефонічні або майльом. Більше деталів находит ся на фейсбуковым сайті Братства.