Сумар дня на 31. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 31. серпня/авґуста 2020 р.

Поломникы підут зо Ждыні до Ґорлиц

З благословліня владыкы Паісия, архієпископа перемышльско-ґорлицкой єпархіі Польской Автокефальной Православной Церкви, 5. вересня/септембра 2020 рока пройде 3. піше поломництво зо Ждыні до Ґорлиц на свято покровителя єпархіі, священномученика Максима. О 5.00 год. в церкви в Ждыни, де был хрещеный св. Максим, буде правлена св. літургія, по котрій зачне ся путуваня до Ґорлиц. Поломникы підут через Ґладышів, Маластівску Маґуру, Прислоп, Новицю, Білянку, Шымбарк, Ропицю Польску аж до Ґорлиц. Вшыткы, котры хотіли бы взяти участ в поломництві, прошены сут записати ся до 3. вересня/септембра під номерами поданыма на офіцийным сайті подіі на фейсбуку. Вписове 10 злотых – сума покрыє кошты секурациі і ідла. Особы неполнолітні мусят мати згоду родичів.

Закрытя ґондольовой желізниці на Парковій Горі в Креници

Од заране, тє. од 1. вересня/септембра, до 15. грудня/децембра тр. ґондольова желізниця на Парковій Горі в Креници буде закрыта в звязку з перебудовом будинку выжньой стациі. Інвестиция має на ціли одтворити історичный, довоєнный характер обєкту, як тіж ввести новы опциі для туристів. В одновленым будинку одкрыют реставрацию і видоковы тарасы. Добудуваны будут два тарасы, з котрых буде мож обзерати панораму Крениці, Бескіды ци Креницку Яворину. Пошыреный буде перон выжньой стациі та введены будут додатковы розвязаня для неполносправных осіб або подорожуючых з візками для діти. Ґондольова желізниця на Паркову Гору єст найстаршым того рода обєктом в Польщы. Першыраз была одкрыта 8. грудня/децембра 1937 рока.

Потягы ретро вертают на торы

Рушат 6. едиция Малопольскых Пути Желізницьовой Туристикы. Заплянувано десят переіздів забытковыма складами. В текучым році новином будут трансмісиі в інтернеті. З причыны пандеміі коронавіруса тогорічна едиция акциі буде дакус менше шумна як влони. Потягы рушат в трасы, але будут мочы забрати менше пасажерів як в попередніх едициях. До переіздів будут схоснуваны забытковы локомотивы і ваґоны з першой половины ХХ столітя, якы стацийонуют в Скансені Желізницьового Табору в Хабівці. Орґанізаторы подіі заохочуют тіж видіти стациі, з якых одыйдут і до якых придут забытковы склады ретро. Переізды буде мож видіти і нажыво в інтернеті, в сервісах Ютюб і Фейсбук. 26. вересня/септембра забытковы потягы підут з Нового Санча до Мушыны, з Мушыны до Крениці і з Мушыны до Жеґєстова. Наступного дня склады підут в трасу з Нового Санча до Біча і з Біча до Ґорлиц. В вікенд 3.-4. жолтня/октобра потягы рушат з Тарнова до Тухова і з Тарнова до Жабна, а 11. листопада/новембра з Хабівкы до Нового Санча. Послідні переізды з Хабівкы до Мшаны Нижньой і з Хабівкы до Рабкы пройдут 5. грудня/децембра тр.

Пілнічна Словация буде ся дальше розвивала

Пряшівскій край вытворил три субреґіоны про еврофонды. Установліня границ субреґіонів на новый проґрамовый період 2021-2027 было в пятницю, 28. серпня/авґуста, цілю стрічы представників окресів і міст Свидник і Стропків з ведіньом Уряду Пряшівского Самосправного Краю. Пряшівскій Самосправный Край вызначыл на своій териториі три субреґіоны – Спиш, Шариш і Выжній Земплин. Окрес Свидник буде належал до реґіону Шариш, а окрес Стропків до реґіону Выжній Земплин. Становліня так званых субреґіонів выходит з методикы Міністерства Інвестиций, Реґіонального Розвитку і Інформатизациі Словацкой Республикы, яка подає напрямы односно статуту Рады Партнерства, якій є основным про рішаня еврофондів і інчых джерел в новым проґрамовым періоді. На стрічы была досягнена границя медже окресами Свидник і Стропків, якы в минулым были єдным окресом, але якы з історичного погляду належат до інчых історичных реґіонів. Субреґіон Спиш буде мал свій центр в Попраді, реґіон Шариш в Пряшові, а Выжній Земплин в Гуменным. Субреґіоны были вытворены на основі аналізы історично-ґеоґрафічных факторів, транспортовой інфраструктуры, локалізациі промысловых парків, можливости туристичного руху і інчых.