Сумар дня на 31. мая 2024 р.

Приносиме вам сумар медияльной ґрупы ЛЕМ.фм+ на ден 31. мая 2024 р.

Польскій президент заветувал новелизацию меншынового закону вызнаючу шлезскій реґіональный язык

Президент Польской Республикы Анджей Дуда одмовил підписаня уставы з 26. квітня/апріля 2024 р. о зміні закону о нацийональных і етнічных меншынах та реґіональным языку і в середу 29. мая передал Соймови закон до повторного розсмотріня. Згідно з новелизацийом закону, шлезскій язык стал бы другым, при кашебскым, реґіональным языком в Польщы. Як мож чытати в комунікаті на офіцияльным сайті Канцеляриі Президента, рішаючы о веті президент узнал, же не был сполненый выникаючый з закону выміг «даючый можливіст отримати шлезскым етнолектом статус реґіонального языка». Підперто ся опініями експертів, серед котрых подля комунікату «переважат становиско, же шлезскы говіркы сут говірками польского языка, а шлезскій діалект, на котрый ся складают, єст такым самым діалектом польского языка як прим. діалект малопольскій, великопольскій і мазовєцкій». Як подано дальше в комунікаті, «Президент поділяючы непокій, же вызнаня шлезского етнолекту за реґіональный язых, а тым самым обнятя го охороном з того выникаючом, може спричынити подібны жаданя в представників інчых реґіональных ґруп, хотячых плекати своі локальны языкы, кєруючы ся одповідальністю за державу, думат, же не мож заапробувати жадань о обнятя окрисленых языковых діалектів переписами закону з дня 6. січня 2005 р. о нацийональных і етнічных меншынах та реґіональным языку, при браку до того єднозначных мериторичных і правных основ, особливо в теперішній социяльній і ґеополітичній ситуациі».

Інвестициі ПСК в окресі Снина

Председа Пряшівского Самосправного Краю (ПСК) Мілян Маєрскій одбыл дальшу робочу візиту, тот раз в окресі Снина. В понедільок 27. мая жупан дискутувал з социйоекономічныма партнерами о зреализуваных інвестициях на териториі, і о потенциялі. ПСК заінвестувало дотепер мілийон евро, жебы забезпечыти про 24 села воду і про 28 сел окресу канализацию. Окрем того од 2018 р. жупа заінвестувала в окресі уж 16,7 млн евро на дорогову інфраструктуру. Актуально будує ся м.ін. 74-кілометрова біциґльова траса Poloniny trail, котра має ожывити туристичный рух і буде мала получыня з Польщом і Украіном. Більше про другы плянуваны інвестициі прочытате в дописі на нашым портали.

Біциґльова пут получыла Старину і Рускє

Старину і бывше село Рускє в сниньскым окресі на Словацииі получыло 14,3 км зреконструуваных біциґльовых стежок. Роботы тырвали веце як рік, а цілковитый кошт інвестициі то 7,4 млн евро. Офіцияльне одданя зреконструуваных стежок прошло в віторок 28. мая. Як подал председа ПСК Мілян Маєрскій, то не вшытко, бо «уж в близкым часі то буде о новых выбудуваных ци добудуваных цикльотрасах і в напрямі на Стащын, та медже Влычом і Кривым». Інвестициі мают не лем притягнути векше чысло туристів, але і принести новы робочы можливости для жытелів реґіону. Веце чытайте на нашым портали.

Утрудніня в руху в Польковицях

Ґміна Польковиці припоминат, што од понеділька 3. червця/юнія, в звязку з ремонтом, закрытый для автомобільного руху буде желізничный перехід на повітовій дорозі 1169D в сторону місцевости Тшебч і Ґузіце. Утрудніня мают потрырвати до 15. червця/юнія. В звязку з тым, на пятьох леніях містной комунікациі на час ремонту будут введены новы розклады ізды. Найти мож іх на сайті Закладу Містной Комунікациі в Польковицях або на сайті ґміны.