Сумар дня на 31. мая 2021 р.

Приносиме вам сумар медияльной ґрупы ЛЕМ.фм+ на ден 31. мая 2021 р.

Білінґвальны STEM жены в науці

Сербскє Mіністество про людскы права, права меншын і социяльный діалоґ зорґанізувало 25. мая тр. в Палаци Сербія в Бельграді презентацию проєкту пн. Білінґвальны STEM жены в науці. Як подала аґентура Рутенпрес, проєкт реализувало Общаньскє Здружыня руСТЕМ з Руского Керестура. Проєкт был підпореный Міністерством Освіты, Наукы і Технолоґічного Розвитку. Даный проґрам STEM (з анґ. наука, техонолоґія, інжынєрство і математика) є направленый на дівчата од 14. до 18. рока жытя, котры сут з білінґвальных сел або міст, ходят до шкіл, котры сут з навчальным языком меншын, і мотивує іх, жебы ся заінтересували споминаныма науками, і по студиях дальше учыли тоты наукы. Участны на подіі были м.ін. шеф ресорту людскых і меншыновых прав, міністерка Ґордана Чоміч, державный секретар Міністерства про людскы права, права меншын і социяльный діалоґ Олена Папуґа, председа Нацийонального Совіту Русинів Борислав Сакач, председа Општины Куля Даміян Мілянич і науковці з Руского Керестура. Проєкт є презентуваный і в брошурі, де чытатель найде жены з наукы, котрых материньскым языком є русиньскій, мадярьскій, словацкій і босняцкій.

«Не вірте в резервуары»

Сестры Рікы, Фундация Ґрінмайнд, Товариство для Землі, Коаліция Ратуйме Рікы та Жытелі долины Вислокы просят в вікенд од 4. до 6. червця/юнія в Низкій Бескід. Як інформуют на офіцийній страні подіі в сіти фейсбук, просят до місцевости, котры з причыны будовы штучного резервуару Конты-Мысцова будут выселены і заляны, зникнут хыжы, поля, паствиска, сідлиска хороненой звірины. Подія зачне ся в пятницю о 17.00 год. в Контах-Мысцовій плястичныма варштатами для діти. В наступны дни будут зорґанізуваны м.ін. прогулька по резервуарі з Полян до Мысцовой, выстава, інсталяция, гепенінґы, музичны варштаты, але і поважны бесіды про будуче долины Вислокы і єй жытелів.

Вечер Оповідань в Маґурскым Нацийональным Парку

Маґурскій Нацийональный Парк орґанізує в долгій вікенд подію для діти. В середу, 2. червця/юнія, з нагоды Дня Дітины просят на Вечер Оповідань, якій буде вела Йоанна Сарнецка з Фундациі для Культуры «Валізка». О год. 16.00 подія пройде в Дидактичній Загороді при Едукацийно-Музейным Осередку в Крампній, а о год. 19.00 в Парку в Липинках. Вступ на подіі єст дармовый, а на діти за участ ждут подаркы.

В Вапенным одновили Лавочку при фонтанні

На фейсбуковым профіли Ґміны Санкова явила ся інформация про одновлену фонтанну в Вапенным. Як подают, од пятниці, 21. мая, до свойой давной функцийональности вернула Лавочка при фонтанні в Вапенным. Жытелі курорту і туристы можут ся уж тішыти одновленым обєктом, якій ся находит в селі при Наполеоньскій Променаді.