Сумар дня на 31. марця 2021 р.

Приносиме вам сумар медияльной ґрупы ЛЕМ.фм+ на ден 31. марця 2021 р.

Бесіда про леґіслятиву на засіданю Выбору про Нацийональны Меншыны і Етнічны Ґрупы

В пятницю, 26. марця, в формі онляйн одбыло ся 39. і 40. засіданя Выбору про Нацийональны Меншыны і Етнічны Ґрупы Рады Влады Словацкой Республикы про людскы права, нацийональны меншыны і родову рівніст. Бесідувано на ним м.ін. о роботах ґу приготовліню закону о поставліню нацийональных меншын ци о меншыновым высыланю в телерадию RTVS. Члены выбору достали на засіданю інформацию о схваліню Справы о стані хоснуваня языків нацийональных меншын на териториі Словацкой Республикы за рокы 2019 і 2020. На выборі была приєднана і інформация о приготовлінях Оцінюючой справы Выбору о підпорі культуры, о стані шкільництва і о хоснуваню языків нацийональных меншын за рокы 2019 і 2020. Бесідувано і о рыхтуваню оцініня полніня задач пляну діянь охороны прав осіб, якы належат до нацийональных меншын і етнічных ґруп на рокы 2016-2020 і пропозициі на актуализацию задач. Важном частю засіданя меншынового выбору было бесідуваня про леґіслятиву. Участны засіданя достали інформацию о новелизациі шкільного закону о выхованю і освіті, в рамках котрой буде уж дефініюваный термін нацийонального шкільництва. Іщы важнійшым єст зачати роботы при законі о поставліню нацийональных меншын, якого дотепер Словация не мала. Меншыновы права, котры сут записаны і в конституциі, были частично елементами інчых законів, але не істнувал єден комплексовый закон. 15. грудня/децембра 2020 р. выникнула робоча ґрупа, котра має закон рыхтувати. Выбір про Нацийональны Меншыны і Етнічны Ґрупы буде годен номінувати пят членів робочой ґрупы за меншыны. Уж тепер Русины мают двох своіх представників в тій ґрупі, покликаных Міляном Буковскым, полномічным влады про меншыны і председом меншынового выбору: Мартіна Дуфалу і Мілана Яна Піліпа.

Быбір бесідувал о меншыновым высыланю RTVS

На онляйн засіданю Выбору про Нацийональны Меншыны і Етнічны Ґрупы, якє прошло 26. марця, бесідувано і о новій концепциі высыланя RTVS, якє має в будучности розшырювати высыланя про меншыны, при схоснуваню діґітальной фреквенциі DAB+. Фінально нацийональне высыланя мало бы быти і в русиньскым языку. Русины дождают ся і новой літературно-драматичной творчости, на початку в формі пєс в русиньскым языку. Од вересня/септембра тр. збільшыт ся о 100% денна часова дотация на нацийональне высыланя в телевізиі. Зрыхтуваны будут і меншыновы версиі інформацийного вебсайту Správy RTVS. Вчас засіданя Петро Медвід, будучый єдным з представників русиньской меншыны, вызвал членів приняти резолюцию, котром выбір высловит незгоду з заміряным Міністерством Культуры злучыньом Фонду на Підпору Культур Нацийональных Меншын з інчом схемом дотаций. Резолюцию підпорили дальшы члены і голосуваня проходит актуально per rollam. Дальше засіданя выбору є плянуване на місяц май.

Зверніня владыкы Ніля Лущака про канонічный статус Мукачівской Грекокатолицкой Єпархіі

В минулым тыжни владыка Ніль Лущак, апостольскій адміністратор Мукачівской Грекокатолицкой Єпархіі, выдал окреме зверніня на тему спекуляций о можливым приєднаню Мукачівской Єпархііі до Украіньской Грекокатолицкой Церкви. Владыка припомнул в документі о радістным часі Ювілейного Рока 2021 про Мукачівску Єпархію. Дальше однюс ся до дискусий в социяльных сітях што до канонічного статусу Мукачівской Грекокатолицкой Єпархіі: Апостольскій Престіл признає Мукачівскій Єпархіі статус Церкви свого права. Як дале пише владыка, як католикы ся тримают наряджынь і позиций Апостольской Столиці, в тым чыслі і што до вопросу статусу іх церкви. Продолжує, што окрем найвысшой влады Церкви не істнує ниякій компетентный форум або інстанция, котра бы могла змінити канонічный статус дакотрой з церкви свого права. Владыка просил о молитву за Церков і не влучати ся в дискусиі, якы можут пошкодити мир і християньску любов, окремо в час Великого Посту.

Заран в Польщы зачынат ся повселюдне списуваня

Уж заран рушат в Польщы Нацийональне Повселюдне Списуваня Жытелів і Мешкань 2021. Буде мож в ним окрислити м.ін. свою нацийональніст і хоснуваный язык, в тым окрему лемківску нацийональніст і материньскій лемківскій язык. Списати ся мож через інтернет або телефон, а коли дозволит на тото епідемічна ситуация, буде мож списати ся при безпосереднім контакті з урядником. Участ в списі єст анонімова. Інформациі і чысла зобраны вчас тогорічного спису сут особливо важны дла лемківской меншыны – можут быти основом дальшой державной політикы взглядом Лемків.