Сумар дня на 30. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 30. жолтня/октобра 2023 р.

Засуджена кара за зневажыня шлезской соспільности

Особа, котра зневажыла шлезску соспільніст на інтернетовым порталю, была сказана на 30 годин соспільных прац. Наказовый вырок (без проведіня судового засіданя) выдал 9. жолтня/октобра Рейоновый Суд в Сємяновицях Шлезскых. Вырок не єст остаточный, сказаный Адриян Т. може подати іщы апеляцию. Што важне, в рішыню суд ясно вказал, што Шлезачкы і Шлезакы то ґрупа о окремій етнічній приналежности. Перше в 2021 р. зачати поступуваня в справі можливости злочыну одмовила Рейонова Прокуратура Катовиці-Схід. Завідомліня зложыла ініциятива Uotwarty Ślůnsk, подля котрой образливый впис сполнял вымогы чыну з 257 арт. карного кодексу, котрый тыкат кары вязниці для того, хто публичного зневажат ґрупу людности або поєдну особу з причыны єй нацийональной, етнічной, расовой, реліґійной приналежности, або з такых причын нарушат тілесну нетыкальніст другой особы. Подля катовицкой прокуратуры о злочыні не мож было бесідувати, зато же Шлезакы не сут вызнаны нацийональном або етнічном меншыном. Припомнийме, што правну охорону мают лем меншыны вымінены в законі о нацийональных і етнічных меншынах і о реґіональным языку, в тым лемківска меншына.

Дві парохіі перемышльско-ґорлицкой єпархіі перейдут на новый стиль

Як поінформувал парох православной парохіі св. Тройці в Саноку о. Йоан Антонович, на просьбу вірных православных парохій в Саноку і Загірю, владыка Паісий, архієпископ перемышльско-ґорлицкой єпархіі, благословил на введіня до літургічного жытя в тых парохіях на пробный період неоюлияньского календаря. Значыт тото, же вірны будут святкувати нерухомы свята за тзв. новым стильом, а Пасху і повязаны з ньом праздникы за тзв. старым стильом. Пробный період зачне ся 15. листопада/новембра тр. і завершыт 14. листопада/новембра 2024 р. То першы парохіі в перемышльско-ґорлицкій єпархіі, котры рішыли святкувати за новым стильом.

Консультациі в справі будовы роверовой дорогы в Польковицях

Польковиці дальше рыхтуют будову роверовой дорогы вздолж ул. 3 Мая. Од 30. жолтня/октобра до 7. листопада/новембра урядник з ґмінного реферату інвестициі буде до диспозициі жытелів заінтересуваных будовом дорогы. То велика інвестиция, котра буде інґерувала в інфраструктуру в центрі міста. Задача єст на етапі опрацуваня технічной документациі, зато мож тепер іщы зголосити своі увагы. В тым місяци в польковицкым ратушы проходили соспільны консультациі в тій справі. Жытелі зголосили пару уваг, м.ін. такых, котры звекшыли бы безпеку біциґлистів. Кєд же в консультациях брало участ лем парунадцет осіб, бургомайстер Польковиц рішыл іщы раз дати жытелям можливіст сконсультувати інвестицию і выяснити вшелеякы вантпливости.

Православна парохія в Рєґєтові хоче провести ремонт

Православна Парохія в Ґладышові з філийом в Реґєтові просит о фінансове спертя невеликой православной соспільности в Реґєтові. Парохія зачынат ремонт зовнішніх стін реґєтівской святыні. Працы будут обнимати одновліня і забезпечыня специяльным імпреґнатом знищеной і неестетичной деревяной – шалюваной елевациі. Надіют ся встигнути перед святом св. Архістратига Михала – патрона церкви і села Реґєтів, т.є. до 21. листопада/новембра.

Джерело фотоґрафіі: PAP/Andrzej Grygiel