Сумар дня на 30. вересня/септембра 2024 р.

Приносиме вам сумар медияльной ґрупы ЛЕМ.фм+ на ден 30. вересня/септембра 2024 р.

«Кед голубица лєцела» 

В минулый вікенд, в днях од 27. до 29. вересня/септембра в Хорвациі проходила 14. едиция русиньского культурного фестівалю «Кед голубица лєцела», якого орґанізатором єст Дружство Русинів в Хорватскій Республиці «Руснак». Подіі проходили в Вінковцях, Петровцях і Старых Янковцях. Окрем головного культурного проґраму в рамках фестівалю одбыли ся медженародный русиньскій фільмовый вечер ци літературно-музичный вечер. Запрезентували ся локальны русиньскы ансамблі, ак і русиньскы ґрупы зо Словациі. Окрем того в суботу в Старых Янковцях засідала Світова Рада Світового Конґресу Русинів. Фестіваль проходил під покровительством Совіту за Нацийональны Меншыны Хорватской Республикы, з фінансовом підтримком ґмін Богдановці і Стары Янковці та Рады Русиньской Нацийональной Меншыны міста Вуковар.

Лемківска опера доцінена Конґресом Культуры Вроцлавя і Нижнього Шлеска

Лемківска опера «Голос» была выріжнена Конґресом Культуры Вроцлавя і Нижнього Шлеска. З 89 зложеных внесків выбрано 10 проєктів, котры отримают артистичны ґраны в высокости 10 тис. злотых. Як мож чытати в протоколі засіданя комісиі: «о высокій оціні проєкту рішыла тема і єй амбітный, артистичный спосіб презентациі. Доцінено увзглядніня лемківской культуры і істориі в контексті достоменности і діів Нижнього Шлеска. Высоко оцінено выбір ґатунку оперы – як примір высокой культуры, котру внескодавці хотят єднак представити в популяризуючым выданю. Высоко оцінено завдякы тому медияльный потенциял. Позитивно одобрано тіж представленый рівен заанґажуваня і рыхтуваня до проєкту, а тіж опис самого твору, котрый получыт клясичну, народну і електронічну музику». Припомнийме, што премєра лемківской оперы «Голос» композиторкы Дариі Кузяк одбуде ся 24. листопада/новемра в Нацийональным Форум Музикы во Вроцлаві.

Пантеон особности І світовой войны в Нижній Полянці

В минулу пятницю 27. вересня/септембра в Нижній Полянці бардиівского окресу святочно одкрыли пантеон особности І світовой войны. В рамках будовлі єст заінсталюваных 12 табличок присвяченых найвызначнійшым особам, котры брали участ в боях коло Нижньой Полянкы і в шыршій околици. То імена ґенералів, але і писателів, новинарів ци архітектів. Поступно мали бы прибывати дальшы таблиці з іменами. Пантеон єст долгій на 35 метрів, має дві стрільні, што має припоминати воєнный окоп з давного періоду. Єдиный выгляд в пантеоні є на верх Каштелик, де реально проходили боі. Веце про реченый проєкт прочытате на нашым портали.

Выклад др. Войцєха Крукара про тереновы назвы Низкого Бескіду в Рускій Бурсі

Припоминаме, што уж днес в Рускій Бурсі в Ґорлицях буде мож выслухати выклад др. Войцєха Крукара пн. «Тереновы назвы Низкого Бескіду з особливым увзглядніньом ґорлицкого реґіону». Подія зачне ся о 18.00 год. Выклад буде выголошеный в польскым языку. Др Войцєх Крукар єст выдатным специялистом од карпатскых оронімів, автором вельох публикаций на тоту тему і автором вельох карпатскых мап од Низкого Вескіду по Чорногору, в котрых особливу вагу привязує до топонімів і мікротопонімів. Подія буде реализвана завдякы дотациі Міністра Внутрішніх Справ і Адміністрациі. Красні просиме!