Сумар дня на 30. вересня/септембра 2019 р.

Приносиме Вам сумар медияльной ґрупы ЛЕМ.фм на ден 30. вересня/септембра 2019 р.

Терочка в Хорвациі

В суботу, 28. вересня/септембра, в Петровцях – русиньскым селі в Хорвациі, проходила культурно-патріотична подія пн. Кєд голубиця летіла, орґанізувана Дружством Руснак, т.є. головным здружыньом, котре єднат Руснаків в Хорвациі. Того рока торжество присвячене было 170. річници основаня в селі Петровці грекокатолицкой руской школы, де ціла наука одбывала ся в русиньскым языку. Доднес в Петровцях, і дальшых селах, де жыют Русины: в Старых Янковцях і в Вуковарі, вчыт ся русиньского языка в публичных школах. Серед вельох подій повязаных зо святом, была одслужена в місцевій церкви Служба Божа з панихідом за помершом влони вызначном поетесом Любком Сеґеді-Фалц. На сцені дому культуры одбыл ся великій концерт. Выступили домашні ансамблі Дружства Руснак: русиньскы студенткы учытельского выділу університету в Загребі, ансамбль КУД Йоакім Гарді з Петровців, а фольклор Русинів в Лемковины вказал Ансамбль Пісні і Танця Терочка з Ґорлиц.

Церков старша як 200 років?

В суботу 28. вересня/септембра в Ропици прошли торжествя звязаны з празднуваньом 200-літя церкви св. Михала Архангела. Святкуваня получено з кєрмешом. Орґанізатором празднувань был специяльні покликаный Комітет Ювілею. Вчас рыхтувань історичной моноґрафіі церкви на потребу свята, вышло, што церков фактичні была вознесена в 1752 році, а в 1819 або аж і 1813 році была перенесена з попереднього місця. Є то значуче одкрытя, котре потверджат дотеперішні припущыня дослідників церковной архітектуры, тыкаючы істинной даты будовы храму. На торжестві присутны были чысленны римокатолицкы священникы, м.ін. парох з Маластова о. Адам Пронцік і емеритуваный єпископ ряшівскій Казімєж Ґурный. Был тіж грекокатолицкій парох сусідньой Панкной Петро Качмар. Прелекция, тыкаюча істориі церкви і села, выголошена учытельком істориі Малґожатом Блажевич, родом з Ропиці, заінаґурувала святкуваня.

О языку в Пряшові

2. жолтня/октобра на Пряшівскым Університеті пройде 53. науковый семінар карпаторисуністикы. З лекцийом на тему «Рефлекциі русиньского языка в реальным і віртуальным світі» выступит др. Зденка Цітрякова з Інституту Русиньского Языка і Культуры Пряшівского Університету. Інститут є так само орґанізатором подіі. В проґрамі семінара, традицийно уж, буде тіж презентация найновшых выдань з карпаторусиністикы. Стріча зачне ся о 13.00 год.

Низкій Бескід на кадрах Роберта Вербанова

Ґалерия Вельо Кольорів в Кракові просит на вернісаж выставы фотоґрафіі Роберта Вербанова, якій на чорно-білых знимках затримал розмаіты кадры Низкого Бекісду, особливо Лемковины. Роберт Вербанов вродил ся в 1964 р. во Вроцлаві. Є філолоґом, журналистом, фотоґрафіком. Од семох років жыє в Низкым Бескіді. Фотоґрафує вшытко, што є му близкє і знаєме – люди, звірята, краєвиды. Робліня знимок є для него формом репортажу – затримує в кадрах момент часу, ілюстрациі до фурт діючой ся істориі, до того, што проходит. Вернісаж зачне ся о 19.00 год.

«Малопольска Екотуристика»

В Старым Санчы 18. жолтня/октобра пройде бранжове школіня пн. «Екотуристика – марком Малопольщы. Як схоснувати сучасны тренды до зрівноваженого туристичного розвитку і будуваня екотуристичной оферты?». Школіня направлене є для сандецкого субреґіону і являт ся частю більшого проєкту «Малопольска Екотуристика» резлізуваного Фондом Партнерства при фінансовій підпорі Малопольского Воєвідства. Задачом проєкту є промоция реґіону в зрівноваженый і одповідальный спосіб з як найменьшом інвазийом для натурального середовиска і заінтересуваньом його богатства і спадковины. Екотуристика є важным нарядьом для розвитку локального бізнесу і розвиваня новых, інновацийных, зеленых рынків роботы.

Фот. Роберт Вербанов