Сумар дня на 30. січня/януара 2023 р.

Приносиме вам сумар медияльной ґрупы ЛЕМ.фм+ на ден 30. січня/януара 2023 р.

Выстава творів Енді Варголя в Саудийскій Арабіі

Уж неодолга творы Енді Варголя мож буде обзерати в Саудийскій Арабіі. Выстава буде доступна три місяці, од 17. лютого/фебруара в рамках AlUla Arts Festival 2023 в центрі куьтуры Maraya. Презентуваных буде 70 творів короля поп-арту, в тым портреты знаных целебритів, але і фільмовы портреты осіб контркультуры з 60. років ХХ столітя, рідкы архівальны фотоґрафіі і єдну з цікавшых артистичных інсталяций Варголя пн. «Срібрны Хмары». АльУля, де ся одбуде выстава, находит ся на пустыни. Є єдным з найстаршых міст на Арабскым Пілострові і першым місцьом в Саудийскій Арабіі вписаным на список світовой спадковины Юнеско. На єй обшыри находят ся монументальны старожытны гробовці, якы мают 7 тисячів років, натуральны скальны формациі і каньон. Незалежно од істориі, АльУля стає ся центром штукы, культуры і розрывкы – од найвызначнійшой світовой модерной штукы презентуваной в Maraya, по ґіґантичны інсталяциі на пустыни, авторства локальных і медженародных артистів.

Ґміны ґорлицкого повіту розбудуйут водопроводы і канализацию

До трьох ґмін ґорлицкого повіту трафит понад 10 млн злотых з унійного Проґраму Розвитку Сельскых Обшыри на рокы 2014-2020. Ґміны Лужна, Липинкы і сельска ґміна Ґорлиці схоснуют середкы на інвестицию в водопроводы і канализацию. Што важне, дофінансуваня тыкают цілости інвестициі, самоуряды не мусят іх спілфінансувати. Ґміна Ґорлиці зреализує за 3,3 млн злотых уж готовы проєкты тыкаючы головно водопроводів. Нову сіт долгости близко 8 км побудуют в Кобылянці, Домініковицях і Стужівці. Буде і 500 м канализациі в Заґужанах. Як подал війт ґміны Ґорлиці, іщы в тым році будут ся старати о дофінансуваня інвестиций в другых місцевостях ґміны. Липинкы в рамках Проґраму отримают 3,7 млн злотых і так само схоснуют середкы на будову водопроводу і канализациі. М.ін. буде то ок 450 м водопроводу в Розділю. За війтом ґміны Липинкы, хоц долгіст водопроводу не єст велика, то є то важна інвестиция для жытелів села, якы будут мочы хоснувати біжучу воду.

Выстава Юлиі Яржы пн. «Хыжкы / Низкій Безкід»

В пятницю 3. лютого/фебруара о 18.00 год. в Ґалериі Штукы Двір Карвациянів в Ґорлицях пройде вернісаж выставы Юлиі Яржы пн. «Хыжкы / Низкій Безкід». Працы над презентуваным на выставі цикльом образів тырвали два рокы. Творы сут пробом затриманя в артистичным кадрі найкрасшых, а часто лишеных мешкальных домів, костелів, церкви, як і будинків епохы PRL, якы творят незвычайный кольорит реґіону. Більшіст прац была зрыхтуваня в мішаній техніці – еколіна і лінорыт, лученій техніком коляжу. Выстава буде досупна до 8. марця тр.

Новый туристичный комунікат БНП

Бєщадскій Нацийональный Парк выдал новый туристичный комунікат. Шлякы на обшыри Парку сут в більшости одкрыты і выдоптаны. В горах є змінна, нерівна снігова покрыва грубости од 5 до 50 цм, а в місцях акумуляциі снігу до 90 цм. Обставины для вандрівок сут середні. На шляках выступує обледжыня, зато природникы не рекомендуют выходити в горы без рачків. В тых днях проґнозуваный єст і сильный вітер. Ідучы в горы, треба памятати м.ін. о одповіднім облечыню, зимовым ґратю, меринді, повербанку ци лямпці. Конечно треба достосувати годину старту до плянуваной трасы і власных можливости. Актуально в горах обовязує перша, низка ступін лявиновой загорозы. Актуальну хвилю мож провірити примірно на інтернетовым сайті GOPR ци інтернетовых камерах БНП.

Джерело фотоґрафіі: https://whatsonsaudiarabia.com/