Сумар дня на 30. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 30. серпня/авґуста 2024 р.

ІнНовиця 2024

В будучым тыжни, в днях од 5. до 7. вересня/септембра одбудут ся в Новици XVІІ Театральны Стрічы ІнНовиця 2024. Орґанізаторами подіі сут Стоваришыя Приятелів Новиці і Ґмінный Осередок Культуры в Устю Рускым. ІнНовиця то театральный перегляд, фестіваль творчости, де мож стрітити вшелеякы театральны ґрупы з Польщы і заграниці. Окрем представлінь в проґрамі находят ся і інчы товаришучы подіі, такы як варштаты малюваня на шклі, прогулька едукацийоном стежком, выставы і інчы.

Выстава портретів жытелів Лемковины

Од днес в реґіональным Музею ім. Станіслава Санковского в Радомску буде одкрыта выстава фотоґрафій Кжыштофа Пєжґальского пн. «Сліды». Запрезентуваных буде 30 фотоґрафій теперішніх жытелів Лемковины, Лемків і Поляків, в більшости утриманых в конвенциі середовискового портрету. Дополніньом сут образы лемківскых сел і деталів важных для наррациі. При знимках находят ся описы, будучы фраґментами споминів фотоґрафуваных осіб. Днешньому вернісажови, котрого початок єст заплянуваный на 17.00 год., буде товаришыла промоция фотоґрафічной книжкы «Сліды, Лемковина в реляциях жытелів».

Округлый ювілей Зоріі і Росы

В будучым місяци свій округлый ювілей будут святкувати хор Зоря і дітячый хор Роса. Двадцет років діяльности одзначыт ювілейный концерт, якій одбуде ся в суботу 28. вересня/септембра в авли Комплексу Шкіл в Устю Русым. Початок концерту о 16.00 год. Окрем Зорі і Росы на концерті гостинно выступит ансамбль Бурян. Як заявлят хор Зоря, окрем забавы і музикы буде тіж несподіванка, о якій неодолга поінформуют на своім фейсбуковым сайті. Проєкт был зреализуваный при фінансовій підпорі Малопольского Воєвідства. Медже патронами подіі сут Стоваришыня «Руска Бурса» в Ґорлицях і медияльна ґрупа ЛЕМ.фм+.

«Низкій Бескід на ровері – Загыненый світ Бойків, Лемків і Погірян»

Припоминаме, што уж заран одбуде ся біциґльовый райд «Низкій Бескід на ровері – Загыненый світ Бойків, Лемків і Погірян», якій орґанізує Стоваришыня GorliceBike. Райд зачне ся о 10.00 при Центрі Лыжного Спорту і Родинной Рекреациі в Кривій. Інтернетовы записы сут уж заперты, опцийональні мож ся записати в ден райду в Центрі в Кривій перед початком райду, єданк чысло місц буде ограничене. Біциґлисты з Кривой переіхают до Ґладышова, через Смерековец, Шквіртне, Реґетів, Ждыню до Радоцины, Чорного і назад до Ясюнкы і Кривой, разом близко 50 км. По дорозі участникы зайдут до церкви в Квятони, на воєнны цмонтері, переіхают через неістнуючы днес лемківскы села – такы як Чорне ци Радоцина. В Радоцині стрітят ся з лісниками. О цікавых подіях і істориях оповіст вчас райду реконструктор і популяризатор локальной істориі Михал Ромпала. На закінчыня роверовой прогулькы в Кривій пройде пікнік, де буде тіж музична част. На сцені запрезентує ся лемківскій ансамбль Руской Бурсы з Ґорлиц Терочка і погіряньскій ансамбль Поляне.