Сумар дня на 30. марця 2022 р.

Приносиме вам сумар медияльной ґрупы ЛЕМ.фм+ на ден 30. марця 2022 р.

В Бруксели урядували вс. біженців з Украіну

В понедільок, 28. марця т.р., в Бруксели проходило надзвычайне засіданя Рады Евросоюзу дс. Выміру Справедливости і Внутрішніх Справ. Стріча была посвячена европейскій координациі приниманя біженців з Украіны. Польщу репрезентувал Бартош Ґродецкій, віцеміністер внутрішніх справ і адмінітрациі. Дискуция зосереджала ся особливо на гляданю можности материяльной і фінансовой підпоры для членьскых держав Уніі, якы безпосередньо находят ся під міґрацийном пресийом. Узнали за необхідне скоординувати механізмы дальшых подорожы громадян Украіны в рамках Евросоюзу. Вчас засіданя Рады, міністры онляйново бесідували з украіньскым міністром внутрішніх справ Денісом Монастырскым. Чергове, формальне засіданя Рады Евросоюзу дс. Выміру Справедливости і Внутрішніх Справ пройде в Люксембурґу в днях 9.-10. червця/юнія т.р.

Free Shop Ilios and Humanosh

В Ґладышові в будинку Протиогньовой Стражы од тыжня діє дармовый маґазин і склеп, в котрым вшыткы потрібуючы, особливо біженці з Украіны, можу взяти абсолютні дармо: облечыня, черевікы, лашкы для діти, дурачкы/смочкы ци памперсы. Склеп є одкрытый штоден од понеділька до пятниці в годинах од 12.00 до 14.00. За його основаня одповідают дві Фундациі – Іліос та Гуманош – Фундация ім. Славы і Ізка Волосяньскых, якы од початку атаку Росиі на Украіну активні помагают м.ін. в розлокуваню втікаючых родин, опікуют ся біженцями та орґанізуют гуманітарну поміч для тых, котры находят ся в загороженых обшырях Украіны. Охочы підперти діяльніст Фундациі Іліос можут тото зробити напр. передаючы фінансовы даткы. Грошы перезначаны сут на закуп ідла до фундацийной реставрациі Климківскы Смакы, в котрій особы з неполносправностями рыхтуют ідло для біженців, дальше – тіж на закуп лікарств ци палива до авт, транспортуючых гуманітарну поміч. Веце найдете на сайті fundacja-ilios.pl .

Стоп Пожарам Трав

Повітова Коменда Державной Протиогньовой Стражы в Ґорлицях апелює, жебы не выпаляти травы і кряча. Лем передвчером дошло до 236 примірів пожарів травы, єден з них перешол в пожар ліса, але оген повело ся опанувати. Што рока, коли приходит яр, мож обсервувати масове выпаляня трав, котре несе загорозу великыма пожарами лісів, лук, ґаздівок і інчых будівли. Ефектом такого безрозумного діяня сут вельомілийоновы материяльны страты, неодвертальны страты в натуральным середовиску і выпадкы з людми, якы кінчат ся поважныма попеченями тіла, а тіж смертю. Прилучаме ся до закликів і гасла кампаніі: Стоп Пожарам Трав. Веце найдете на сайті Головной Коменды Протиогньовой Стражы в Варшаві.

Русиньскій школя выріжнены за фільмы о м.ін. русиньскых селах

Село Земплиньскы Гамры нагородило русиньского школяря Матуша Кімака памятном плякєтом за відеа о землиньскых містах і селах, котрыма розславлят реґіон. Своі відеа Матуш Кімак поміщат в сервісі Youtube, єст іх гын уж коло 130. За пілтора рока змапувал вшыткы села в окресах Снина і Маджелабірці, та част з окресів Гуменне, Воронів над Топльов і Собранці. Серед тых сел находит ся очывидно вельо русиньскых. Початково Матуш Кімак, котрый є студентом ґімназиі в Гуменным, відеа робил мобільком і з біциґля, пак зачал іх нагрывати професийональном камером і посередництвом дрона. Фільмы, то не лем кадры зо сел, але автор передає в них і ґеоґрафічне, історичне знаня та ріжны додатковы річы про місцевы памятникы, або інчы цікавинкы.